新居啟動之貮拾貮 - 廚房拉籃

有人話廚房拉籃係一個廚櫃嘅靈魂，相信係誇張了，但一個好嘅拉籃又真係會令到啲位用得嚟更加得心應手。

我個廚房因為長度唔夠，所以都有啲300mm嘅位置淨返，呢個時候用拉籃就fit晒。拉籃一般都要搵不銹鋼做，去旺角就會發現一個拉籃加路軌都唔平㗎，有啲要上千蚊㗎。當然，淘寶都有好多選擇，似乎一個叫櫻花牌嘅牌子算係名牌，都係講緊三四百人仔max，所以我一早已經諗住淘㗎喇。

師傅寸嘴話大陸嗰啲唔係不銹鋼，我就不以為然，香港賣一千嘅貨，其實都係大陸造，計埋物流、鋪租、人工，真正貨物成本只有三成都只係等閒事，即係話價錢其實相若，所以只要搵到商譽較好嘅商人，其實個風險唔高，而是係真慳到錢。

呢個……係我本來嘅計劃。

由於師傅麻煩嘅nature，計劃又要就佢。佢話訂傢俬嘅廠要有埋拉籃嚟裝同預位，自己買嘅籃佢要送埋上大陸，所以如果我自己買，佢啲櫃就唔訂住，大我咁喎。另一方面，佢用間廠啲拉籃300mm都賣600蚊港紙，仲好老實咁同我講話唔係不銹鋼，真係吹漲！

雖然有啲咁嘅波折，但我而家嘅脾氣實在太好，而我嘅目的都係要件事完滿解決，錢都唔係最重要，所以我叫咗佢照落order，照用非不銹鋼嘅拉籃，諗住第時壞先換啦，而家做低師傅先。