尋晚收工後去咗旺角買啲嘢先去新屋視察，依輪都係行呢個模式，因為工作繁忙，都要「揸」緊時間逐少逐少買呢啲嘢。
今晚就買咗工人厠個Steel King鏡櫃，同埋掛喺牆上面條Day&Day不鏽鋼通，好似話好耐用嘅。個鏡櫃都激死人，上個週末睇啱咗個大特價鏡櫃，$8xx減到四百幾，但因為想對下尺寸先，所以無即刻買到，估唔到尋日啱啱賣晒啦！結果都係畀$438買咗個細兩個size嘅……所以真係抵嘅就要趁手呢。
2013年5月31日星期五
2013年5月30日星期四
新居啟動之肆拾壹 - 傢俬安裝進度報告
繼續有進展，書櫃層板同門都裝上了，我只設計了一道門，所以收埋口就應該算已經完成安裝了。
睡房地台床及衣櫃都已經擺好位，足夠承托我入去影咗張相呢！
唯一我覺得櫃入面唔應該用白色，當時無諗到，否則加錢都要攪攪佢。
未修口都算貼伏，呢個算收貨。
2013年5月28日星期二
新居啟動之叄拾捌 - 木造傢俬到了
嘩！我星期日才往心裏投訴說這星期好像進度不多，兩天後的今天一看，傢俬都已經搬過來了！現在堆滿屋一包包的都是木頭……
而廚櫃和廁所櫃都已經安裝了呢。
富美家的膠板看上去效果唔錯喎，廁所隻cherry木色同隻石磚都幾夾；而廚房嘅黑、白、銀相配都達到心目中摩登嘅效果。
Corian無縫石都可以進行度尺了。
呢一邊係洗衣機同星盆，冷熱水喉會經呢度出。上面個櫃有一半嘅一半會畀條油煙喉霸咗一半（！）有下次的話，我哋要好好考慮呢個問題……
除了這個是造錯了，跟了之前的那幅錯圖，左手邊的應該要造四個櫃桶的。師傅話會改返，要更換這一組組件。地球叔叔，對不起了。
突出來呢個就係「面盆的疑惑」嘅最後效果，好事多磨呢……
呢邊係煮食爐位，上面係抽油煙機同更多儲物櫃。個圓角櫃係整嚟俾個雪櫃推入去，師傅都有諗過嘅，佢話擺裝意粉嘅玻璃瓶會靚，呢樣畀返credit佢。
2013年5月26日星期日
新居啟動之叄拾柒 - 磁磚防滑指數
記得我同太太第一次去旺角買磚，不時都聽到啲sales講防滑指數，一時R9、一時R10，聽落好似好勁咁。
直到今天，雖然我已經買晒所有磚，但係仍然想尋個明白。終於我「的」起心肝，上網揾咗啲有關資料。
首先，R字頭嘅防滑值係源自德國嘅DIN 51130標準，R值由R9到R13，唔係由R1開始！呢個德國標準係透過穿上安全鞋測試人員站在加了潤滑油嘅測試物料上，然後計算測試員在哪一個傾角開始滑動，再用以下嘅圖表，就可以得出R值。
當然，看上去R9好似好流，但對於一般家居，至少R9都達到一定防滑水平，會唔會好過無做過測試嘅一啲大陸磚呢？呢個就要我哋自己判斷了。根據下面幅圖，即使係客廳，最好都要有R10。其實大陸都要快啲加入呢啲標準了……
值得留意嘅係，呢個德國標準並唔係國際標準，有啲地方仍然唔認同呢種測試方法，例如英國。點都好，R值喺好多地方都被接受，而我哋，作為消費者都係知多啲好，唔係好容易被拋窒！
BB攻略之叄 - 嬰兒揹帶
除咗嬰兒床、高櫈之外，當日AEON減價我哋仲買埋嬰兒揹帶。同浴盆一樣，佢哋又係有N隻牌子，價錢個range仲大，由三百蚊到千零蚊都有，有大牌子亦有啲未聽過嘅。
大牌子有Aprica、Combi、Chicco，其他有隻日本造嘅叫Eightex，再之外就係台灣貨，最平好似係呢啲。
Chicco喺AEON只有隻2 way，所以就rule out咗，唔想再花時間揾了。
台灣貨平咗一截，有啲令人唔放心，始終揹帶都關乎BB安全，買個心安都要嘅。
反而我以為太太會fancy日本造嘅Eightex五合一BB揹帶，佢一向唔太放心大陸造嘅貨品嘛。
但估唔到佢都只係稍稍掙扎就集中考慮Aprica同埋Combi，兩個都係日本牌子，但係就大陸造，不過太太覺得都要達到某啲標準嘅，相信日本人都係用呢啲貨啩。比較Aprica同Combi兩隻之後，包括質感、質量等等，最後我哋就揀咗Combi嘅Premiumbreezing，今日件貨都到咗喇，係適合男仔嘅藍色㗎！
2013年5月25日星期六
BB攻略之貮 - 摺疊式浴盆
前個週末吉之島有BB用品減價，我哋諗住今次去買埋最後一批BB用品，BB床、BB櫈、BB浴盆等等。
BB浴盆係我哋最後無買到嘅，一來牌子好多，我哋都唔知點揀，另外太太話一田有隻摺疊式浴盆嚟緊會減價，所以都諗咗一陣。最後我上網望下個摺疊式浴盆係乜東東，覺得係好嘢，因為浴室始終唔大，容易收藏嘅嘢有好大嘅用處！
喺上網研究過程，我發現香港原來有兩隻摺疊式浴盆較受歡迎，一隻係我哋買嗰隻Karibu Folding Bath，似乎係香港牌子同大陸造，另一隻Stokke Flexi Bath係丹麥牌子丹麥造，價錢就後者貴少少，都係標價四百零蚊。
望上去就好似Flexi bath型格一啲，畢竟秉承北歐嘅設計風格，不過我就覺得軟膠成份居多，有啲似屋企啲收納箱，總覺得唔太穩陣，同埋睇網上評論話呢個款啱大個啲小孩仲啱用。
至於Karibu，我覺得設計幾好，同埋容易明白，又相對夠硬淨，同其他睇過嘅浴盆有得比，啱出生BB用，我哋又唔會喺戶外用浴盆，所以唔駛Flexi Bath咁輕巧，反而想實淨啲。於是，雖然係made in China，我哋都揀咗呢隻嘅紫色版本。
2013年5月23日星期四
BB攻略之壹 - 嬰兒手推車
有見新屋裝修已漸上軌道，我諗都係時候記錄低我人生另一個大Project嘅過程了。而呢個過程入面學習到嘅嘢，希望不久嘅將來又可以再用啦！
呢個大project就係我小BB嘅誕生喇，我同太太都已經花咗唔少心機準備小B嘅到來，希望第一次過程順順利利。喺呢個Blog入面，我姑且集中於物質上嘅準備先，關於心理心情上、醫學上、養生等等，等我ready一啲先再分享。
今日就先分享下買手推車嘅經驗先啦。
自從準備BB到來之後，我越來越留意喺街人哋用咩BB車牌子、有咩款式等等，我見都不外乎嗰幾個：Aprica、Chicco、Combi、Peg Perego、Quinny等，後來我仲透過Facebook認識咗英國Silver Cross呢個牌子，啲車款好歐洲feel㗎！
後來我見有幾個朋友都用Peg Perego，同佢係意大利牌子，無可否認，意大利牌子喺我心入面係高啲嘅，去過意大利都會愛上佢，仲有，啲裝修料都係意大利靚啲啦，相信佢都會安全啲（主觀意願）。太太亦都好初期就鎖定咗呢個牌子，一拍即合，Good！
至於Peg Perego都有幾個款，一般香港人都話用P3呢個款，比較平同輕啲，適合香港使用，反而其他就較重，難啲上車落車、搬嚟搬去。我哋本來都諗住係咁，但後來我哋知道買水貨會平好多，所以都用上網買呢個途徑。因為咁，我先知道原來P3呢個款已經幾舊，雖然香港仲有賣，但係意大利同美國都已經phase out咗唔賣了，我信心就減弱咗啲，有得揀都唔好買幾年前啲model啦，雖然係平千零兩千蚊……
最後我哋揀咗最新嘅Book Plus，貪佢可以易啲摺埋同個樣討好啲，本來我哋想要Pois Black嘅，不過小貨店無貨源，我哋就揀咗呢個Pois Grey。
尋日收到email，佢已經上船運緊嚟香港喇，要七月先運到，仲有排等呢！
2013年5月22日星期三
新居啟動之叄拾陸 - 燈槽製作
今日係有啲驚喜，又見木門框裝緊，又見燈槽都差唔多攪掂，
似乎黑雨並無影響到師傅嘅進度喎……
間屋越來越似樣了……
似乎黑雨並無影響到師傅嘅進度喎……
間屋越來越似樣了……
 |
| 開始時運嚟嘅燈槽用嘅木板料 |
 |
| 未完成嘅燈槽，開頭有用木方頂住未固定好嘅燈槽 |
 |
| 廚房位出面嘅燈槽位，開始加咗一兩塊木板 |
 |
| 呢個就係完成咗嘅廚房位燈槽， 成塊木板包住條樑陣，比我想像中闊呢。 |
 |
| 固定完成嘅燈槽 |
 |
| 另一個角度，呢邊會裝Cam。 |
 |
| 嚟一個Wide shot先！ |
 |
| 另一邊再嚟一個！ |
新居啟動之叄拾伍 - 木門安裝
今朝早黑雨，所以今晩好心急咁上咗去單位睇有無漏水，好彩都無事，仲見到木工師傅已經開始裝門框喇。
如果我無理解錯，裝門框前要先在石屎門位加幾塊木板邊，作用應該係將門框固喺上面、同埋整直個門邊位。廁所已經裝上咗個門框啦，摸落出滑嘟嘟的，好開心！因為係趟門，所以門框會突出少少，我而家先知原來連框都會突咋。
喺地下仲有個大門框，好闊嘅，相信係廚房個框啩，其實真係無諗過咁闊，好誇張！
 |
| 呢個係較薄嘅門框，我覺得係房門嘅 |
 |
| 呢個係超闊嘅門框，可能係廚房嘅， 因為用趟門可能會睇落闊啲 |
 |
| 另一個角度嘅闊闊門 |
 |
| 裝門框前先要釘塊木板，再將門框安裝上去 |
 |
| 已經安裝好嘅廁所門框，右上角崩咗…… |
 |
| 門框同門邊木板都要加工，呢一刻並未完全貼伏。 |
 |
| 用嚟頂住趟門嘅部分，突出咗一寸有多呢 |
訂閱：
文章 (Atom)