BB攻略之貮 - 摺疊式浴盆

前個週末吉之島有BB用品減價，我哋諗住今次去買埋最後一批BB用品，BB床、BB櫈、BB浴盆等等。

BB浴盆係我哋最後無買到嘅，一來牌子好多，我哋都唔知點揀，另外太太話一田有隻摺疊式浴盆嚟緊會減價，所以都諗咗一陣。最後我上網望下個摺疊式浴盆係乜東東，覺得係好嘢，因為浴室始終唔大，容易收藏嘅嘢有好大嘅用處！

喺上網研究過程，我發現香港原來有兩隻摺疊式浴盆較受歡迎，一隻係我哋買嗰隻Karibu Folding Bath，似乎係香港牌子同大陸造，另一隻Stokke Flexi Bath係丹麥牌子丹麥造，價錢就後者貴少少，都係標價四百零蚊。

望上去就好似Flexi bath型格一啲，畢竟秉承北歐嘅設計風格，不過我就覺得軟膠成份居多，有啲似屋企啲收納箱，總覺得唔太穩陣，同埋睇網上評論話呢個款啱大個啲小孩仲啱用。

至於Karibu，我覺得設計幾好，同埋容易明白，又相對夠硬淨，同其他睇過嘅浴盆有得比，啱出生BB用，我哋又唔會喺戶外用浴盆，所以唔駛Flexi Bath咁輕巧，反而想實淨啲。於是，雖然係made in China，我哋都揀咗呢隻嘅紫色版本。