GG土耳其之夏之玖 - 惑於Cappadocia之森（上集）

在一早玩過熱氣球之後，我哋返酒店休息了一下同嘆咗個正早餐，然後我哋又透過酒店叔叔BOOK咗個local tour，主要係行吓Cappadocia有名嘅景點，喺嗰度，唔租車或跟團係唔得架，我哋第一日就行咗好耐，雖然自己行都有好處，不過去稍為遠啲嘅地方就唔可以了。

呢個local tour帶咗我哋去一兩個valley睇奇石，跟住去咗一個地下城參觀，又去咗個河谷遠足咗一陣，大開眼界咗一輪之後，就已經到咗黃昏時分了，都係無乜好講，睇相啦……哈哈！

 

 

 

 

GG土耳其之夏之捌 - 奇妙熱氣球體驗@Cappadocia

在伊斯坦堡留了四晩之後，我倆向Cappadocia進發了。一大清早便搭飛機到Kayseri，找到了約好的司機便往Göreme出發。

Cappadocia在香港旅行團嘅土耳其團中被稱為「奇石林」，顧名思義，當然係怪石處處，密集成林了。據說星戰電影就喺度取景，呢度又確實係似外星地貌嘅。

嚟到Cappadocia，乘坐熱氣球睇日出同從高空觀賞奇石係一大亮點，在book酒店時我已經順便book埋，我相信大部分酒店都會有類似嘅安排，標價應該是€150一位，酒店就offer€110一位，友情價是也，我不敢再議價了，熱氣球太平我也不敢坐呢。

草草地瞓一晚便要出發了，四點前就要出發，當時係七月，日出時間很早，遲了就睇唔到日出，早啲起身仲可以多啲時間玩，我哋仲book咗個local tour，等返嚟之後再出發的。不過，雖然係早，但一路上已經見到好多熱氣球充好氣，隨時可以出發的樣子，反而，我哋個熱氣球就仲準備中，未得住，呢段時間我哋就食下啲餅乾、咖啡醫下肚先，見到有日本或韓國團準備咗即食麵，真係周到！

等吓等吓，身邊已經有好多升起咗嘅熱氣球，到我哋個氣球都升圯咗，我哋就踩上去了。一個籃坐十個人左右，唔算寬敞又唔算逼嘅，不過如果要自拍就要大家遷就吓囉。

氣球升起時其實天已經白晒，可幸之處在於有個山丘，太陽會喺個山丘後面慢慢升上嚟，我哋都算睇到有日出嘅效果，日出之後氣溫明顯高返，真係唔知如果冬天嚟會係點樣……

 

 

 

至於上咗天上面之後嘅嘢就唔寫了，睇相或睇片就夠了，感覺真係好正！熱氣球本身已經係一好特別嘅活動，而加上Cappadocia嘅奇異風光，絕對係一絕。最緊要帶定足夠嘅memory card，拍片拍照都唔少得，我當時用電話影咗好多相，點知唔記得backup，部iphone瓜咗就無晒成個土耳其trip嘅相，真係諗起都心傷……

 

 

 

新居啟動之柒拾壹 - 窗簾完工篇

這算是「駱駝背上的最後一根稻草」嗎？嘻嘻、連窗簾都安裝好了，只等我們搬入去了。

看上去還不錯吧！

新居啟動之柒拾 - 燈飾貨到安裝

上次提過喺元朗合益路一間叫巴黎站嘅燈鋪買咗4盞燈，週末安裝了，姑且貼上來紀念一番。

效果不錯，算是同心目中的預期效果一樣吧。房燈就比較簡單，也是幾百蚊的貨色，所以評價一般，哈哈。

新居啟動之陸拾玖 - 宜家衣櫃及書枱製成品

早前喺宜家訂嘅書枱同衣櫃星期二晩到咗，upload返上嚟留個記錄啫。

講開呢兩件嘢，我就真係有啲失策，度牆身闊度時竟然睇漏咗個燈制，結果攞得太盡，個櫃擺好位後遮住咗個冷氣開關制，要將個櫃拉離牆一啲先得；然後我又忘記咗冷氣機嘅厚度，以為個櫃可以泊埋道牆，而條陣會頂住，所以買咗個200cm高嘅櫃，點知個冷氣機都係頂，所以又係要拉出啲，條陣一啲影響都無，早知可以㨂個236cm高嘅櫃啦……真係失禮呢……

新居啟動之陸拾捌 - 訂造窗簾@元朗

承接尋日所講，我同太太尋日一次過喺元朗搞掂咗燈飾同窗簾。

綜合網上資訊，元朗窗簾鋪主要集中喺元朗大橋街巿、教育路同合益路。大橋街市似乎係最平、教育路似乎最多鋪頭、合益路就最近我屋企，所以貪方便嘅我只係行咗合益路。

合益路唔係好長，不過都有起碼5間窗簾鋪。我就行咗3間，有一間好似就執笠所以無睇，有一間叫恆寶兼營牆紙，當時覺得唔夠專同埋門面較暗，所以無入到去，但後來見網上都有人介紹呢間，話布嘅選擇較多。

行第一間叫一本，小店一間，印象唔深，行入去一排都未有人招呼，因為有人投訴緊。Well……我畀咗一至兩分鐘時間佢，都係無人理，只能夠話佢服務好一般，企正喺隔離都淨係掛住搞complaint。有人有投訴，我當然唔會踩落去。

第二間叫瑞祥，網上有人讚好，但唔知有幾堅，我覺得負責人都熟手嘅，態度都ok。布料選擇係多嘅，低、中、高價位都有，因為我隻窗闊，佢話要用闊幅布，最平係$98一碼，亦有$128、$2xx、$4xx一碼。但係佢安裝就收我$800，九龍區度尺就再收多$200。感覺安裝唔駛收咁貴囉，裝6個窗唔駛一日人工啩。

因此，我行咗去第三間叫富達。佢應該淨係做經濟實惠嘅生意，全鋪都係$88蚊一碼、遮光料就$128一碼，安裝只收$300，度尺免費。計埋都有平幾多，所以最後我就帶咗太太嚟呢間。約咗下個禮拜度尺，希望無鑊氣！

P.S. 做功課揀咗幾隻布款，太太篩選後只剩下一款，T_T……

新居啟動之陸拾柒 - 購買燈飾@元朗

既然決定了下個月要搬入新居，無論照顧BB有幾忙都好，始終要為新居嘅工程埋尾。今日，我同太太就搞掂了燈飾同窗簾。

由於要湊B嘅關係，買嘢地點一定要喺元朗，所以我都無同旺角等地方格價，最緊要係唔好花我太多時間。結果，我行咗合益路幾轉，每次行過我都睇下啲燈飾，本來都睇中咗啲飛利浦燈嘅，雖然價錢係偏向貴啲，不過諗住質素高啲嘛。

點知早兩日我又去合益路做功課，畀我發現到有間叫巴黎站嘅燈飾鋪，佢啲燈嘅設計幾啱心水，唔係平時見開嗰啲款，價錢做標價嘅七折，感覺係相宜嘅，一盞6頭天花燈折實後千三蚊。向太太交功課後，今日下午就去嗰度確認燈款同落單，買咗飯廳吊燈一盞、客廳6頭天花燈一盞、主人房仔房吸頂燈各一盞，連埋慳電膽就埋單三千蚊左右。

心中感覺都良好嘅，雖然難免係大陸造，但飛利浦都係大陸造啦，而我哋又真係無時間上深圳田貝四路嘛，更加唔想同人講價，因此，特此推介。

新居啟動之陸拾陸 - 選購現成傢俬

新居裝修已經差不多完成，只差執漏。我見樓上裝修已經完工、而再樓上嘅裝修都應該差唔多啦啩，所以打算九月中就搬入去，都係時候買埋啲唔諗住訂造嘅傢俬了。

唔訂造呢啲傢俬嘅原因主要係想買現成嘅慳返啲，所以買嘅傢俬都唔會買貴嘅。衣櫃同書枱就買IKEA嘅PAX及GALANT系列；囝囝房張子母床同餐枱就去元朗附近嘅傢俬舖買，都喺預算之內，希望實物都一樣ok啦！

新居啟動之陸拾伍 - 分析廚房無縫石

嘩！已經有一個月無update個裝修blog了。今日週末時分，等我補寫返一啲之前無寫嘅題材啦。

之前一直以為現居個廚房個工作平台係用啲類似塑膠嘅物料做的，到新屋裝修學咗嘢先知道原來呢啲叫無縫石，係一種合成嘅堅硬物料，溶點高過攝氏100度，所以適合家居用途；而另一方面，佢嘅溶點亦只係100度多啲，所以可塑性強，容易造出彎曲嘅效果，同埋可以用黏著劑達到無縫黏著嘅效果，感覺上就係一塊過，因而稱為「無縫石」。

無縫石由美國DuPont首創Corian，後來當然係仿品如雨後春荀般出現，師傅第一次係報Samsung Staron畀我哋；現居則用Surell，係Formica旗下嘅牌子。似乎一般都係呢幾隻牌子，Corian貴啲，Surell平啲，Staron似乎係最平。Corian同Staron每季都有幾款石做特價，其實來來去去都係幾款，平過其他好多㗎，睇錢份上就用大路貨啦。我經朋友介紹，用Corian有$6xx一直呎，好似話代理攞貨都係呢個價喎…… Surell我就無特別研究了。

咁除咗無縫石仲有咩選擇呀？我知道而家都多人考慮用石英石，其實都係人造石嘅一種，不過用料同工序都同無縫石不同，佢硬度好足夠、溶點幾千度，得出嚟嘅就係更耐用嘅物料。缺點係「有縫」會見到接駁位，同埋無咁流線形的，因為物料嘅可塑性較低。不過，從網上都睇得出石英石越來越普遍，技術仍然係新，所以唔排除以上嘅問題好快會被解決。

當然，人造石以外就仲有天然嘅雲石、麻石同不銹鋼材。一般認為天然石係靚啲、天然啲，不過可能會疏水，因為石，尤其係雲石，係有孔的（porous）。不銹鋼就見人見智，餐廳廚房都係用不銹鋼，容易打理，不過要小心唔好整花。

GG土耳其之夏之伍 - 伊斯坦堡街頭小吃

雖然我話伊斯坦堡比好多歐洲城市更歐洲，但無可否認，佢亦包含了好多亞洲風味，例如土耳其人嘅熱情、Bazzar嘅熱鬧、無序感，及街頭如過江之鯽嘅小食店。

我兩口子對食最為敏感，街頭小吃也試了一些，以下只是稍為分享一下。Turkish delight當然唔算街頭小食，不過係土耳其小吃嘅一絕，所以順帶提一下吧。

燒粟米同烚粟米，以我所見應該係最受歡迎嘅食物，我們在旅程最後一天終於試了一條燒的，你睇太太食得幾咁開懷？

 

呢間Turkish delight舖頭出名㗎，location又好易揾，試食又疏爽，呵呵。一試就知同人哋買做紀念品嘅差幾皮！我哋買咗好幾款試食，最後下面中間有糖霜包住嗰隻跑出咗，我哋買咗五、六條返香港慢慢食。真係好味的，唔太甜、又果味濃郁！

 

呢隻就係土耳其雪糕dondurma喇，佢比我哋平時食嘅雪糕係杰啲同有嚼勁嘅，感覺都幾得意嘅，大熱天時就更加可愛了。

 

由old town到Galata嗰邊有一條跨海大橋，橋邊似乎長期都有無限咁多人在釣魚，橋下有一連串嘅做遊客生意嘅海鮮餐廳，一副遊客陷阱的樣子。不過，有一樣食物是地道的，它就是fish sandwiches。簡單的麵包上夾一塊煎魚，價錢只係3.5里拉，真係抵，至於係咪好好味就見仁見智了，都ok嘅，而是幾有風味𠻹……