新居啟動之陸拾柒 - 購買燈飾@元朗

既然決定了下個月要搬入新居，無論照顧BB有幾忙都好，始終要為新居嘅工程埋尾。今日，我同太太就搞掂了燈飾同窗簾。

由於要湊B嘅關係，買嘢地點一定要喺元朗，所以我都無同旺角等地方格價，最緊要係唔好花我太多時間。結果，我行咗合益路幾轉，每次行過我都睇下啲燈飾，本來都睇中咗啲飛利浦燈嘅，雖然價錢係偏向貴啲，不過諗住質素高啲嘛。

點知早兩日我又去合益路做功課，畀我發現到有間叫巴黎站嘅燈飾鋪，佢啲燈嘅設計幾啱心水，唔係平時見開嗰啲款，價錢做標價嘅七折，感覺係相宜嘅，一盞6頭天花燈折實後千三蚊。向太太交功課後，今日下午就去嗰度確認燈款同落單，買咗飯廳吊燈一盞、客廳6頭天花燈一盞、主人房仔房吸頂燈各一盞，連埋慳電膽就埋單三千蚊左右。

心中感覺都良好嘅，雖然難免係大陸造，但飛利浦都係大陸造啦，而我哋又真係無時間上深圳田貝四路嘛，更加唔想同人講價，因此，特此推介。