GG土耳其之夏之柒 - 必須要試一次的土耳其浴經驗談

我相信土耳其浴絕對係去土耳其一個不得不試嘅經歷。人在伊斯坦堡，便會留意到土耳其浴場大行其道，其造型及規模只比清真寺低一級，更有不少為歷史性建築物，由名建築師設計。

土耳其浴其實係有啲類似焗桑拿，不過就唔係太多濕蒸或乾蒸，我覺得重點係先要喺一個較熱嘅房間出汗，以達致排毒嘅效果，然後再有專人替你沐浴及按摩，呢一切都喺公共浴場發生，要私人空間就可能要問清楚有無咁嘅可能了。

我朋友Eric都覺得土耳其浴係要試，但佢覺得畀啲鬍鬚佬喺身上抹嚟抹去好嘔心喎，唔知其他人怕唔怕，怕就要有心理準備喇。

反而我較花多啲時間諗下點同老婆一齊去Hamam，經過一輪research，我知道有好多浴場都招待男女賓，只不過好多都要分開沐浴，我哋又唔係好想分開玩，行孖咇開心啲。另外我亦都想揾啲較有歷史嘅浴場，首選由大建築師設計的。

終於，其實只有一個選擇，我揀咗Süleymaniye Hamam（地址：Mimar Sinan Caddesi  No:20 Süleymaniye），佢係伊斯坦布堡唯一一間可以男女共浴嘅土耳其浴場，咁我同太太就可以一齊試呢個體驗啦，建築師係Mimar Sinan，即係起Topkapi Palace同Süleymaniye Mosque嘅大師傅。當然，要提一提大家男女共浴都係由男性工作人員負責的，按摩擦身亦然，大家如果接受唔到就唔好試了，其他男女分浴嘅浴場係有女服務員的，千祈唔好為咗呢啲嘢而唔開心呀。

太太話個服務員都有就住，無攪胸部等敏感部位，你估網絡色情小說咩？我哋都覺得按摩擦身都好舒服，真係周身舒泰㗎。如果時間許可，我都想去多次，呵呵！

Hamam內典雅的裝潢。

太太徹底排毒後滿足的樣子。

GG土耳其之夏之陸 - Bosphorus海峽之旅

歐洲大陸同亞洲大陸嘅分隔之處一向唔係太清晰，因為歐亞大陸其實就係一大塊land mass。不過，一般嚟講都認為Bosphorus海峽就係歐、亞分隔之地，所以土耳其也被認為係橫跨歐、亞嘅國家。而伊斯坦堡就更加係隔住個海峽就可以由歐洲望見亞洲，喺1453年，奧斯曼帝國嘅海軍就係沿住Bosphorus海峽由北面、東面及南面，同西面嘅陸軍夾攻過來。

今天，遊客可以乘搭渡輪從伊斯坦堡出發，沿著Bosphorus海峽北上遊覽，我兩口子當然無錯過了。

Official嘅渡輪由伊斯坦堡渡輪碼頭出發，大家要問下或者揾下邊一個票站係賣Bosphorus cruise嘅船飛喇，買咗飛先至去碼頭等船，都好多人㗎，記得帶定多啲水去飲呢……

GG土耳其之夏之肆 - Fine dining@伊斯坦堡

早一個entry介紹過伊斯坦堡嘅Kebab，今次等我介紹吓上次去伊斯坦堡fine dining嘅經驗啦。

其實我哋只係跟Lonely Planet嘅介紹，去咗一間由當地嘅一位celebrity chef Mehmet Gürs開嘅餐廳啫。根據書本所講呢位Mehmet Gürs嘅出名程度就好似Jamie Oliver喺英美嘅程度相若。Wikipedia亦有話佢係「Istanbul's most recognizable chef」。

Mikla餐廳位於伊斯坦堡北面嘅Beyoğlu區，喺一間叫Pera Palace Hotel嘅最高兩層，上面係酒吧，下面係餐廳，個view正到不得了，嘢食亦都係比較特別嘅地中海及瑞典風菜式，而且仲要係celebrity chef做主廚喎，我記得價錢係幾相宜，以整體配套嚟講好似都係幾百蚊，唔駛過千。

結果太太玩得食得好開心，我都覺得成日玩budget遊或中budget遊，間唔時都要加啲呢啲元素，縱容吓自己，話晒而家都係成年人，要開始識得享受了……

從餐廳頂樓的酒吧，望向Sultanahmet嘅方向，可見蘇菲亞大教堂、藍色清真寺及Taksim呢邊嘅Galata Tower，正！

偷得浮生半日閒，當日未到蒲吧時間，成個場都係我倆嘅。

第一客頭盤，太太記得呢個係沙甸魚薄脆，脆而不膩，口感一流。

頭盤二號，薄切煙燻牛肉併芝士，配搭幾新鮮，好味！

主菜一，呢個無記錯應該係鵪鶉。

呢個係焞牛仔肉伴綠豆湯

食吓食吓已經係黃昏時分，從窗台向外望向Golden Horn方向，果然有金光閃閃嘅意境呢！

Zoom埋去舊城區，可見黃昏色調嘅三大建築，Nice view也！

Zoom後一啲，就見返黃昏時分嘅Borsphorus海峽同Golden Horn嘅入口

BB攻略之玖 - Peg Perego Book Plus船運抵港

兩個半月前在bidbuy4u訂購嘅Peg Perego Book Plus終於早幾日船運抵港，花咗唔少汗水終於將BB車送上的士回家啦！

呢㗎係Pois Grey花紋，係次選嚟嘅，首選嘅Pois Black美國網購無晒，不過無壞，呢隻花都唔差。

Go through咗廿零個步驟，終於將BB車砌好，幾型嘅，不過都重囉，有成十公斤重，要單手拎得起兩包米先可以單手操作。有好有唔好嘅，重啲咪堅固啲，推起上嚟無咁震囉，買得Peg Perego都預咗係重，要輕便就要買其他牌子喇。

埋單係$3800左右，香港買呢個model應該要$5900，算做慳咗好多㗎喇，始終都係made in Italy嘛。

希望快啲可以同BB去街街！

GG土耳其之夏之叄 - Kebab大推介

在去土耳其之前，我哋對Kebab已經耳熟能詳，畢竟香港都有得食，歐洲亦好common。但耳熟並不代表知道真相，其實我哋平時見嘅嗰種Kebab只係Kebab嘅其中一種。

只要身處土耳其，向餐廳攞個餐牌睇下，你就會知道Kebab個世界有幾大，自己以前所知嘅有幾少……

不過，出發前我刨Lonely Planet已經知道Kebab只係一個統稱，所以都好希望去土耳其尋找最好食嘅Kebab！

呢條link係英國衛報刊登過嘅一篇伊斯坦堡最好食Kebab嘅十大，寫得都幾有說服力，於是我哋都盡量去試，睇下土耳其嘅正宗Kebab係點樣，雖然最後因為唔就腳而無辦法啦！

http://m.guardian.co.uk/travel/2011/sep/14/10-best-meat-restaurants-istanbul

我哋就試過Osman同埋Cağ兩間。兩間我覺得都無介紹錯喎，前者我哋試咗好有特色嘅Iskender Kebab，後者當然係Cağ kebab，各有所長 ，太太非常喜歡Cağ kebab，所以最後一共去咗3次！

 

其實我哋去呢兩間之前，都試過景點附近一間較為大路嘅kebab，質素就真係麻麻，所以之後嘅反差就好大了。奉勸一句，真係唔好幫襯遊客區附近啲kebab店，可能會令你以為伊斯坦堡嘅kebab不外如是，咁你就蝕了。

最後，我哋仲搵到一間Kebab超好味又勁地道便宜，喺離開伊斯坦堡最後一日我哋都專程去食多一次，諗起都留口水……

 

聽日先補返啲相啦！

GG土耳其之夏之貮 - 伊斯坦堡初夜

尋日寫咗上次土耳其14日之旅嘅行程，今日就開始逐少介紹土耳其嘅吸引之處吧！

由香港去伊斯坦堡，最方便就梗係搭土耳其航空啦，直航之餘又唔算貴。我上次就都係考慮土航同卡塔爾，土航第一日可以早啲到達，但要早一日返香港先有平飛；卡塔爾則要黃昏先到，但可以留足14日喺土耳其，價錢平好似一千蚊左右。最後揀咗卡塔爾，我哋已經係Silver member，所以行李都可以重啲，呢個都係考慮之一。

第一站係伊斯坦堡，鄧翔建議留四、五日，我聽佢話真係前後一共留咗5晚，佢無建議錯，伊斯坦堡真係好多嘢睇，估唔到5晚都仲有啲嘢會miss。

伊斯坦堡以前叫君士坦丁堡，係拜占庭帝國嘅首都，仲記得中一、二嘅世史科嘅人應該唔感到陌生。由於佢係東羅馬東正教教庭所在，擁有超然嘅地位，歷史非常深厚，可以話係一個發展好先進嘅城市。呢個同我哋所見所聞都配合，基本上伊斯坦堡比好多東歐城市感覺更加歐洲，去到你就感覺到㗎喇。

我仲帶咗本講1453年君士坦丁堡被奧托曼帝國攻陷嘅書，因為啱啱開始睇，感覺分外強烈 。

到達伊斯坦堡，喺酒店安頓後已經入夜，酒店下面條街全部都係餐廳，我哋就去咗其中一間品嘗第一餐土耳其美食，結果……驚為天人……太美味了！

不幸地，早陣子電話壞了，電話上的土耳其相全線收了皮，嗰餐飯只剩返呢一張……

 

GG土耳其之夏之壹 - 2012年夏天14日旅程

呢排裝修嘢終於漸漸放得低、BB亦逐步好轉，相信離返家不遠矣。我心頭幾舊大石可以話慢慢放下，可以有餘暇回顧其他事情了……

始終呢個blog都係主打旅遊好，讓我可以記低啲感想，記低啲畫面，又唔需要喺facebook面對咁多人，攪到要就住就住咁。所以，等我以土耳其呢個奇妙嘅國度為題，再、再、再一次重啟GG的奇幻旅程吧！

呢個trip都差唔多一年前，估唔到咁快就過咗一年，而家連仔都生埋:)，下次去土耳其就要同埋Hewitt去喇！希望佢都喜歡我寫嘅點滴啦！

好！等我一陣間畫埋幅土耳其14日之旅嘅地圖先！

基本行情如下：

 

Istanbul 4晚

Goreme (Cappadocia) 2晩

Konya 1晚

Antalya 2晚

Pammukkale 1晚

Selcuk 2晚

Izmir 1晚

Istanbul 1晚

 

新居啟動之陸拾肆 - 茲曼尼梳化入屋

從茲曼尼買的布套皮梳化運到了，當我上到新居時，外母大人已經著工人攪掂了安裝，睇住啡色梳化同木紋磚嘅配搭，只能說磚同梳化嘅顏色都買對了。

還好無揀再大半號嘅梳化model，否則客廳感覺會更細了，有時呢啲嘢很真係有條fine line的。

BB攻略之柒 - 評審IP camera 網絡攝影機

BB剛滿月，雖然仲要留院，但進度良好，相信好快可以返屋企啩！

另一方面，尋日菲傭已經到咗香港，今日大嫂就會帶佢過嚟屋企了。而大概喺呢個月之內我哋就會搬入去新居，真係好多嘢呢個月發生呀！

亦因為有菲傭嘅關係，我呢兩日又上網睇咗啲IP camera，要買埋叫師傅安裝 ，至少要擺一部喺大廳呢。

上網資料搜集，google出嚟不外乎香討、BK，加少少blog，似乎大家都感興趣，但真係話咩真知灼見又唔算多囉。

其實，我本來係想搵個叫Homesee嘅牌子，因為我有個朋友用緊，見好似唔錯，又可以用App操控。但想揾佢都唔容易，似乎一般人都係直接call個sales咁買嘅，但我見啲post都成幾年前，佢個website都好似無埋，所以無乜信心，唯有move on。

網上亦有意見話大陸牌子（咩EasyN、wansview）易壞啲，為免麻煩，我都暫時排除咗大陸牌子先。如果唔介意呢樣嘢，大陸牌子真係平好多，幾百蚊就有交易，一部慳一千蚊，5個cam就慳五千，所以我都要量力而為。

至於國外牌子，就我喺高登、黃金所見，可以考慮台灣幫（Ipux、Compro）、日本Panasonic或德國Level-One。

行咗一輪，我就鎖定咗Ipux，見佢件嘢都靚仔，價錢中檔，而台灣嘢喺科技上都唔差嘅，比Panasonic大陸造仲要平好幾百蚊，計落有貴30-40%㗎，而呢個牌子網上評價都ok！

後來揾到間IP Cam嘅專賣店，花最多時間反而係掙扎於高清同VGA之間，價錢差五舊，究竟值唔值呢？

我諗最緊要考慮我會用咩device去睇段片，我就多數用手機，個screen唔大，高低清都唔差得遠，最緊要係唔好窒，所以低清反而好啲。另一方面，如果你多數用browser嘅，咁bandwidth同解象度都唔係問題，先值得投資多啲。仲有呀，如果要錄低啲Video，細啲file size都易啲manage啦。

最後我就買咗白色嘅ICS1330，盛惠$1290，以2009年嘅產品嚟講，跌價真係好少……

Panasonic網頁得返呢隻wireless又郁得嘅，鋪頭有舊啲嘅款，但都依然係貴幾百蚊……