GG Reboot: 新居啟動之拾陸

正如之前所計劃，應承咗師傅今日會買掃口粉上去，所以尋晚做咗啲關於掃口粉嘅資料搜集。不久就發現掃口粉殊不簡單，同所有其他建材一樣，都係五花八門，唔只牌子多、種類亦都多。香討有篇幾有趣嘅討論，睇落應該係一啲師傅同一位工程師對於掃口粉嘅爭論，撇除大家用詞激烈之外，這位工程師算做為我提供了不少入門知識。

其中就提到了掃口粉嘅種類：

掃口粉有多少種類?

OPC Based 純水泥類 (Ordinary Portland Cement)
(1) 純水泥類 (灰英泥/白英泥)
(2) 純水泥類 (灰英泥/白英泥) + 石灰粉
(3) 純水泥類 (灰英泥/白英泥) + 沙 (河沙/石英沙)

Cementitious Based 水泥基類 (OPC / HAC / PFA / GGBFS)
(4) 水泥基類掃口粉 (灰英泥/白英泥) + 添加劑
(5) 水泥基類掃口粉 (高鋁灰英泥/白英泥) + 添加劑
(6) 水泥基類掃口粉 (灰英泥/白英泥) + 添加劑 + 石英沙
(7) 水泥基類掃口粉 (高鋁灰英泥/白英泥) + 添加劑 + 石英沙

Reactive Resin Based 化學反應樹脂 (Epoxy / Polyurethane)
(8) 化學反應樹脂類掃口粉 (雙組分)
(9) 化學反應樹脂類掃口粉 (雙組分) + 石英沙

Emulsion Paste Based 樹脂乳液 (Acrylic / EVA )

(10) 乳膠類掃口粉

睇完就知道自己學問遠遠不夠，而用掃口粉嘅亦都唔係自己，都係唔好勉強。所以我都只係諗住去返買磚間鋪度叫佢哋介紹返隻啱用嘅。預算方面，由網上得知最貴嘅大概一千蚊一包，係美國牌子，啲人話好似膠水咁嘅質料，唔係個個師傅識用，用時要兩個人同時進行，一個掃、一個抹喎，不過我唔諗住用超貴貨，但用佢嚟做個標準，幾百蚊一包我諗都OK掛。

呢隻就係超貴貨嘅epoxy grout - Laticrete SpectraLOCK

於是我去咗買磚間鋪頭，揀咗色之後佢先話要星期一先有貨，師傅話今日下晝一定要，同埋話佢三百幾蚊貴，百零蚊已經有來佬貨，但係重點係佢又唔係介紹我去邊度買喎，只能夠推斷佢唔係磚嘅專家，唔知去邊度買好。

結果，我就好似隻盲頭烏蠅咁喺砵蘭街行咗幾轉，都係搵唔到磚鋪有外國貨又要現貨，買咗隻大陸造嘅$40/2kg。買咗之後我先諗到其實應該去啲賣水泥嘅地方，應該會多啲選擇同貨。