過去個零月我都花咗唔少時間喺建材公司上，尋日同今日我都有再去，又發現多咗幾類鋪頭，覺得淺談旺角都會係幾得意嘅題目。
首先，全港各式各樣嘅建材公司基本上集中於旺角同灣仔，其他區分都有，不過無呢兩區咁齊全同多選擇。而經過呢個零月，我都係覺得旺角係多鋪頭過灣仔，一般嚟講，大家都同意旺角會比較平啲，而灣仔會相對多啲高檔嘢。因為我哋目標唔係咁高檔，唔需要啲吓吓過萬嘅產品，所以我覺得花喺旺角嘅時間多一啲，不過灣仔近中環，我食飯時間都可以過去睇，所以都有行過好多次架。
講返旺角，建材鋪頭集中於砵蘭街同埋同佢平行嘅上海街，呢兩條街係超長嘅，向太子方向行的話，應該由亞皆老街開始行，頭一段磚鋪會比較多，仲有牆紙同埋地板鋪，同埋有幾間賣潔具嘅。隔離上海街就主要見到燈鋪，同埋有啲五金鋪、潔具鋪。
中段嘅浴室同埋廚房配件比較集中，例如拉籃同毛巾架等等，如果攪掂咗磚、瓦之後就可以嚟呢邊大快朵頤^_^！行到弼街，呢條直街係門鋪嘅集中點，可以喺呢度開始買門之旅，但要記住，除咗弼街之外，砵蘭街依然有不少門鋪，包括龍頭和富木業，所以可以行埋條街先確定。弼街仲有掃口粉嘅專賣店喎。
行到門鋪已經接近尾聲，附近仲有啲玻璃鋪都係比較特別少少嘅。不過去到呢度，人流已經同旺角差一大截，個人認為咁樣令佢哋嘅議價能力下降，所以即使鋪租可能平啲，我都唔覺得佢哋平過旺角。雖然如此，呢度可能睇到啲無咁主流嘅牌子，因為砵蘭街起碼有好幾間大連鎖，相信行過嘅都會有咁嘅感覺，我一路上唔知見到幾多間聯興行囉。去到太子，至少我見到了Moen呢個牌子，雖然都係歐洲牌大陸造，但至少去太子之前我無見過囉，後來查吓先知道係外國大牌子……
講住咁多先……
沒有留言:
發佈留言