之前喺blog度分享過買嬰兒揹帶嘅經驗， 點知道後來試過用hip seat之後， 就幾乎無用過咁滯， 因為基本上佢哋嘅功能 差唔多， 但係hip seat 使用時好似簡單好多。
所以 揹帶只係喺BB三幾個月大之前有用，大到條頸有力 之後 就可以轉用hip seat。 揹帶買得貴都無用， 除非堅持唔用比較方便嘅hip seat。
至於hip seat， 我見大部分的朋友都同我地一樣， 係用同一個韓國牌子，i-angel， 似乎都無乜其他選擇， 而且此乎幾好評價， 間唔時仲有得團購呢！
2014年5月3日星期六
BB攻略之拾 - Hip seat試過就返唔到轉頭
2013年7月26日星期五
BB攻略之玖 - Peg Perego Book Plus船運抵港
兩個半月前在bidbuy4u訂購嘅Peg Perego Book Plus終於早幾日船運抵港，花咗唔少汗水終於將BB車送上的士回家啦！
呢㗎係Pois Grey花紋，係次選嚟嘅，首選嘅Pois Black美國網購無晒，不過無壞，呢隻花都唔差。
Go through咗廿零個步驟，終於將BB車砌好，幾型嘅，不過都重囉，有成十公斤重，要單手拎得起兩包米先可以單手操作。有好有唔好嘅，重啲咪堅固啲，推起上嚟無咁震囉，買得Peg Perego都預咗係重，要輕便就要買其他牌子喇。
埋單係$3800左右，香港買呢個model應該要$5900，算做慳咗好多㗎喇，始終都係made in Italy嘛。
希望快啲可以同BB去街街！
2013年7月3日星期三
BB攻略之柒 - 評審IP camera 網絡攝影機
BB剛滿月，雖然仲要留院，但進度良好，相信好快可以返屋企啩！
另一方面，尋日菲傭已經到咗香港，今日大嫂就會帶佢過嚟屋企了。而大概喺呢個月之內我哋就會搬入去新居，真係好多嘢呢個月發生呀！
亦因為有菲傭嘅關係，我呢兩日又上網睇咗啲IP camera，要買埋叫師傅安裝 ，至少要擺一部喺大廳呢。
上網資料搜集，google出嚟不外乎香討、BK，加少少blog，似乎大家都感興趣，但真係話咩真知灼見又唔算多囉。
其實，我本來係想搵個叫Homesee嘅牌子，因為我有個朋友用緊，見好似唔錯，又可以用App操控。但想揾佢都唔容易，似乎一般人都係直接call個sales咁買嘅，但我見啲post都成幾年前，佢個website都好似無埋，所以無乜信心，唯有move on。
網上亦有意見話大陸牌子（咩EasyN、wansview）易壞啲，為免麻煩，我都暫時排除咗大陸牌子先。如果唔介意呢樣嘢，大陸牌子真係平好多，幾百蚊就有交易，一部慳一千蚊，5個cam就慳五千，所以我都要量力而為。
至於國外牌子，就我喺高登、黃金所見，可以考慮台灣幫（Ipux、Compro）、日本Panasonic或德國Level-One。
行咗一輪，我就鎖定咗Ipux，見佢件嘢都靚仔，價錢中檔，而台灣嘢喺科技上都唔差嘅，比Panasonic大陸造仲要平好幾百蚊，計落有貴30-40%㗎，而呢個牌子網上評價都ok！
後來揾到間IP Cam嘅專賣店，花最多時間反而係掙扎於高清同VGA之間，價錢差五舊，究竟值唔值呢？
我諗最緊要考慮我會用咩device去睇段片，我就多數用手機，個screen唔大，高低清都唔差得遠，最緊要係唔好窒，所以低清反而好啲。另一方面，如果你多數用browser嘅，咁bandwidth同解象度都唔係問題，先值得投資多啲。仲有呀，如果要錄低啲Video，細啲file size都易啲manage啦。
最後我就買咗白色嘅ICS1330，盛惠$1290，以2009年嘅產品嚟講，跌價真係好少……
Panasonic網頁得返呢隻wireless又郁得嘅，鋪頭有舊啲嘅款，但都依然係貴幾百蚊……
2013年6月27日星期四
BB攻略之陸 - 新生兒深切治療及特別嬰兒護理病房
因為小B早咗出世，佢有一段時間都住喺NNICU（新生兒深切治療及特別嬰兒護理病房）。
在每天陪伴BB健康成長嘅同時，我心諗不妨為呢個造福人群嘅病房解開少少神秘面紗，等多啲人可以了解多啲。
其實BB係住喺呢個病房嘅特別護理病房入面，嚴格嚟講唔算係ICU嘅，佢哋話要插晒喉、駁晒機嗰啲先係ICU。
無論如何，病房入面係24小時當值，姑娘同「姐姐」嘅比例高，因為每個初生嬰兒都要得到照顧，入面基本上唔熄燈，只准父母於每日下午五點半至八點半探訪，或父母其中一位於餵奶時間嚟餵奶，祖父母都免問，每次探訪都要表明身份，都幾嚴格㗎。
好多BB都要喺入面留數以星期計，所以私院真係唔好諗，2萬幾蚊一晩喎，隨時要幾廿萬埋單！保險可以claim幾多先？
下面呢部係心跳同氧飽和度嘅，大部分初生都要駁住監察。
呢啲就係NUK嘅一次性乳膠奶嘴，出面真係買唔到，BB好快就習慣咗呢隻，可惜有錢都買唔到……
下面呢部係輸送營養液畀BB嘅，喺BB未能食足奶時，就係靠佢提供各種營養喇，不過條管道係粗啲，打入阿B度令人痛心死了！
呢個係氧氣裝置，我阿B無用過，但見其他B用過，畀佢哋食奶時補充氧氣的，相信同心肺功能發展有關。
好了，分享差不多了，其他牽涉他人私隱，就咁先啦……
2013年6月26日星期三
BB攻略之伍 - BB床來了
為了迎接BB回家，我哋都要做好準備。早兩日BB床送來了，嘩！都好大舊喎，一定有排砌了……呢張0/3嘅BB床，同埋Aprica嘅high chair！
後記：砌床嘅工序尚算簡單，只是現居太狹窄，所以安裝得比較麻煩。
2013年6月3日星期一
BB攻略之肆 - 電動奶泵
喺準備BB物品嘅過程之中，奶泵都係一樣幾重要嘅嘢，尤其對於母親要工作而又想餵哺人奶嘅家庭，而且身邊都好多人用了。我覺得太太喺Baby Kingdom都聽到唔少呢方面嘅嘢，所以我哋好初期去吉之島買嘢時已經有留意。
奶泵有唔同品牌、唔同價位，有單泵、有雙泵，有手動嘅，又有電動嘅，選擇都唔少㗎。
我哋先買咗個Pigeon嘅手動泵，應可以用返啲奶樽，不過後來朋友都話用手動泵會好攰喎，應該買電動泵，佢哋仲話去水貨店買會平過香港買喎。
太太於是介紹咗Medela呢個牌子，似乎一眾太太都係用呢個美國牌子的。佢主要有兩隻款，一隻叫pump in style，另一隻叫freestyle，好似係後者最普遍同功能最全面。喺香港買的話，上代購網加運費同直接揾水貨店差唔多，去水貨店仲方便啲。
不過最後，外母話玩具反斗城做緊特價！於是請太太細佬幫手落單同收貨，連手續費都慳返，呵呵。
P.S. 雖然隨包裝連帶了4個儲奶瓶，不過經測試後，發現奶泵並不一定要用Medela嘅奶瓶，我哋自己買嘅Pigeon儲奶瓶一樣得喎！只需$22蚊一個 ，仲有9折。
2013年5月26日星期日
BB攻略之叄 - 嬰兒揹帶
除咗嬰兒床、高櫈之外，當日AEON減價我哋仲買埋嬰兒揹帶。同浴盆一樣，佢哋又係有N隻牌子，價錢個range仲大，由三百蚊到千零蚊都有，有大牌子亦有啲未聽過嘅。
大牌子有Aprica、Combi、Chicco，其他有隻日本造嘅叫Eightex，再之外就係台灣貨，最平好似係呢啲。
Chicco喺AEON只有隻2 way，所以就rule out咗，唔想再花時間揾了。
台灣貨平咗一截，有啲令人唔放心，始終揹帶都關乎BB安全，買個心安都要嘅。
反而我以為太太會fancy日本造嘅Eightex五合一BB揹帶，佢一向唔太放心大陸造嘅貨品嘛。
但估唔到佢都只係稍稍掙扎就集中考慮Aprica同埋Combi，兩個都係日本牌子，但係就大陸造，不過太太覺得都要達到某啲標準嘅，相信日本人都係用呢啲貨啩。比較Aprica同Combi兩隻之後，包括質感、質量等等，最後我哋就揀咗Combi嘅Premiumbreezing，今日件貨都到咗喇，係適合男仔嘅藍色㗎！
2013年5月25日星期六
BB攻略之貮 - 摺疊式浴盆
前個週末吉之島有BB用品減價，我哋諗住今次去買埋最後一批BB用品，BB床、BB櫈、BB浴盆等等。
BB浴盆係我哋最後無買到嘅，一來牌子好多，我哋都唔知點揀，另外太太話一田有隻摺疊式浴盆嚟緊會減價，所以都諗咗一陣。最後我上網望下個摺疊式浴盆係乜東東，覺得係好嘢，因為浴室始終唔大，容易收藏嘅嘢有好大嘅用處！
喺上網研究過程，我發現香港原來有兩隻摺疊式浴盆較受歡迎，一隻係我哋買嗰隻Karibu Folding Bath，似乎係香港牌子同大陸造，另一隻Stokke Flexi Bath係丹麥牌子丹麥造，價錢就後者貴少少，都係標價四百零蚊。
望上去就好似Flexi bath型格一啲，畢竟秉承北歐嘅設計風格，不過我就覺得軟膠成份居多，有啲似屋企啲收納箱，總覺得唔太穩陣，同埋睇網上評論話呢個款啱大個啲小孩仲啱用。
至於Karibu，我覺得設計幾好，同埋容易明白，又相對夠硬淨，同其他睇過嘅浴盆有得比，啱出生BB用，我哋又唔會喺戶外用浴盆，所以唔駛Flexi Bath咁輕巧，反而想實淨啲。於是，雖然係made in China，我哋都揀咗呢隻嘅紫色版本。
2013年5月23日星期四
BB攻略之壹 - 嬰兒手推車
有見新屋裝修已漸上軌道，我諗都係時候記錄低我人生另一個大Project嘅過程了。而呢個過程入面學習到嘅嘢，希望不久嘅將來又可以再用啦！
呢個大project就係我小BB嘅誕生喇，我同太太都已經花咗唔少心機準備小B嘅到來，希望第一次過程順順利利。喺呢個Blog入面，我姑且集中於物質上嘅準備先，關於心理心情上、醫學上、養生等等，等我ready一啲先再分享。
今日就先分享下買手推車嘅經驗先啦。
自從準備BB到來之後，我越來越留意喺街人哋用咩BB車牌子、有咩款式等等，我見都不外乎嗰幾個：Aprica、Chicco、Combi、Peg Perego、Quinny等，後來我仲透過Facebook認識咗英國Silver Cross呢個牌子，啲車款好歐洲feel㗎！
後來我見有幾個朋友都用Peg Perego，同佢係意大利牌子，無可否認，意大利牌子喺我心入面係高啲嘅，去過意大利都會愛上佢，仲有，啲裝修料都係意大利靚啲啦，相信佢都會安全啲（主觀意願）。太太亦都好初期就鎖定咗呢個牌子，一拍即合，Good！
至於Peg Perego都有幾個款，一般香港人都話用P3呢個款，比較平同輕啲，適合香港使用，反而其他就較重，難啲上車落車、搬嚟搬去。我哋本來都諗住係咁，但後來我哋知道買水貨會平好多，所以都用上網買呢個途徑。因為咁，我先知道原來P3呢個款已經幾舊，雖然香港仲有賣，但係意大利同美國都已經phase out咗唔賣了，我信心就減弱咗啲，有得揀都唔好買幾年前啲model啦，雖然係平千零兩千蚊……
最後我哋揀咗最新嘅Book Plus，貪佢可以易啲摺埋同個樣討好啲，本來我哋想要Pois Black嘅，不過小貨店無貨源，我哋就揀咗呢個Pois Grey。
尋日收到email，佢已經上船運緊嚟香港喇，要七月先運到，仲有排等呢！
訂閱：
文章 (Atom)