今日已經係我哋喺意大利嘅第十一日喇。真係唔數都唔知假期原來已經過咗一半！如果時間可以停頓就好了。
點都好，我哋而家喺前往那不勒斯嘅火車上，車程共五個鐘，家陣先過咗區區一小時，所以我先咁得閒喺度寫吓嘢。
諗返轉頭，其實呢個假期都好充實，節奏雖然無平時咁緊湊，始終都係渡蜜月嘛，但係每日都依然可以由早上玩到食晚飯，真係無乜時間寫嘢。哈哈...除非我唔睇報紙囉，但係旅行完脫晒節我又唔想喎。
究竟我哋去咗邊度玩呢？
第一到第四晚，我哋係住喺威尼斯。
第五晚，我哋就住喺羅蜜歐同茱麗葉嘅故鄉維羅納。
之後三晚我哋就去咗意大利旺角-博洛尼亞。又去吓帕爾馬同摩德納買吓嘢咁樣。
然後我哋就去咗時尚之都米蘭朝聖！好潮之餘仲買咗好多嘢tim！
就係咁，十日就過去了。意大利真係正呀！嘢又好食，又多嘢睇，又多嘢買。嗰種歐洲中古嘅感覺同埋現代感喺唔同嘅城市都有不同嘅表達，真係想寫出嚟都唔得。
當然，以上種種，換來嘅當然係甜蜜嘅回憶啦。:)
