這算是「駱駝背上的最後一根稻草」嗎？嘻嘻、連窗簾都安裝好了，只等我們搬入去了。
看上去還不錯吧！
2013年9月6日星期五
2013年8月24日星期六
新居啟動之柒拾 - 燈飾貨到安裝
上次提過喺元朗合益路一間叫巴黎站嘅燈鋪買咗4盞燈，週末安裝了，姑且貼上來紀念一番。
效果不錯，算是同心目中的預期效果一樣吧。房燈就比較簡單，也是幾百蚊的貨色，所以評價一般，哈哈。
2013年8月21日星期三
新居啟動之陸拾玖 - 宜家衣櫃及書枱製成品
早前喺宜家訂嘅書枱同衣櫃星期二晩到咗，upload返上嚟留個記錄啫。
講開呢兩件嘢，我就真係有啲失策，度牆身闊度時竟然睇漏咗個燈制，結果攞得太盡，個櫃擺好位後遮住咗個冷氣開關制，要將個櫃拉離牆一啲先得；然後我又忘記咗冷氣機嘅厚度，以為個櫃可以泊埋道牆，而條陣會頂住，所以買咗個200cm高嘅櫃，點知個冷氣機都係頂，所以又係要拉出啲，條陣一啲影響都無，早知可以㨂個236cm高嘅櫃啦……真係失禮呢……
2013年8月18日星期日
新居啟動之陸拾捌 - 訂造窗簾@元朗
承接尋日所講，我同太太尋日一次過喺元朗搞掂咗燈飾同窗簾。
綜合網上資訊，元朗窗簾鋪主要集中喺元朗大橋街巿、教育路同合益路。大橋街市似乎係最平、教育路似乎最多鋪頭、合益路就最近我屋企，所以貪方便嘅我只係行咗合益路。
合益路唔係好長，不過都有起碼5間窗簾鋪。我就行咗3間，有一間好似就執笠所以無睇，有一間叫恆寶兼營牆紙，當時覺得唔夠專同埋門面較暗，所以無入到去，但後來見網上都有人介紹呢間，話布嘅選擇較多。
行第一間叫一本，小店一間，印象唔深，行入去一排都未有人招呼，因為有人投訴緊。Well……我畀咗一至兩分鐘時間佢，都係無人理，只能夠話佢服務好一般，企正喺隔離都淨係掛住搞complaint。有人有投訴，我當然唔會踩落去。
第二間叫瑞祥，網上有人讚好，但唔知有幾堅，我覺得負責人都熟手嘅，態度都ok。布料選擇係多嘅，低、中、高價位都有，因為我隻窗闊，佢話要用闊幅布，最平係$98一碼，亦有$128、$2xx、$4xx一碼。但係佢安裝就收我$800，九龍區度尺就再收多$200。感覺安裝唔駛收咁貴囉，裝6個窗唔駛一日人工啩。
因此，我行咗去第三間叫富達。佢應該淨係做經濟實惠嘅生意，全鋪都係$88蚊一碼、遮光料就$128一碼，安裝只收$300，度尺免費。計埋都有平幾多，所以最後我就帶咗太太嚟呢間。約咗下個禮拜度尺，希望無鑊氣！
P.S. 做功課揀咗幾隻布款，太太篩選後只剩下一款，T_T……
2013年8月17日星期六
新居啟動之陸拾柒 - 購買燈飾@元朗
既然決定了下個月要搬入新居，無論照顧BB有幾忙都好，始終要為新居嘅工程埋尾。今日，我同太太就搞掂了燈飾同窗簾。
由於要湊B嘅關係，買嘢地點一定要喺元朗，所以我都無同旺角等地方格價，最緊要係唔好花我太多時間。結果，我行咗合益路幾轉，每次行過我都睇下啲燈飾，本來都睇中咗啲飛利浦燈嘅，雖然價錢係偏向貴啲，不過諗住質素高啲嘛。
點知早兩日我又去合益路做功課，畀我發現到有間叫巴黎站嘅燈飾鋪，佢啲燈嘅設計幾啱心水，唔係平時見開嗰啲款，價錢做標價嘅七折，感覺係相宜嘅，一盞6頭天花燈折實後千三蚊。向太太交功課後，今日下午就去嗰度確認燈款同落單，買咗飯廳吊燈一盞、客廳6頭天花燈一盞、主人房仔房吸頂燈各一盞，連埋慳電膽就埋單三千蚊左右。
心中感覺都良好嘅，雖然難免係大陸造，但飛利浦都係大陸造啦，而我哋又真係無時間上深圳田貝四路嘛，更加唔想同人講價，因此，特此推介。
2013年8月10日星期六
新居啟動之陸拾陸 - 選購現成傢俬
新居裝修已經差不多完成，只差執漏。我見樓上裝修已經完工、而再樓上嘅裝修都應該差唔多啦啩，所以打算九月中就搬入去，都係時候買埋啲唔諗住訂造嘅傢俬了。
唔訂造呢啲傢俬嘅原因主要係想買現成嘅慳返啲，所以買嘅傢俬都唔會買貴嘅。衣櫃同書枱就買IKEA嘅PAX及GALANT系列；囝囝房張子母床同餐枱就去元朗附近嘅傢俬舖買，都喺預算之內，希望實物都一樣ok啦！
新居啟動之陸拾伍 - 分析廚房無縫石
嘩！已經有一個月無update個裝修blog了。今日週末時分，等我補寫返一啲之前無寫嘅題材啦。
之前一直以為現居個廚房個工作平台係用啲類似塑膠嘅物料做的，到新屋裝修學咗嘢先知道原來呢啲叫無縫石，係一種合成嘅堅硬物料，溶點高過攝氏100度，所以適合家居用途；而另一方面，佢嘅溶點亦只係100度多啲，所以可塑性強，容易造出彎曲嘅效果，同埋可以用黏著劑達到無縫黏著嘅效果，感覺上就係一塊過，因而稱為「無縫石」。
無縫石由美國DuPont首創Corian，後來當然係仿品如雨後春荀般出現，師傅第一次係報Samsung Staron畀我哋；現居則用Surell，係Formica旗下嘅牌子。似乎一般都係呢幾隻牌子，Corian貴啲，Surell平啲，Staron似乎係最平。Corian同Staron每季都有幾款石做特價，其實來來去去都係幾款，平過其他好多㗎，睇錢份上就用大路貨啦。我經朋友介紹，用Corian有$6xx一直呎，好似話代理攞貨都係呢個價喎…… Surell我就無特別研究了。
咁除咗無縫石仲有咩選擇呀？我知道而家都多人考慮用石英石，其實都係人造石嘅一種，不過用料同工序都同無縫石不同，佢硬度好足夠、溶點幾千度，得出嚟嘅就係更耐用嘅物料。缺點係「有縫」會見到接駁位，同埋無咁流線形的，因為物料嘅可塑性較低。不過，從網上都睇得出石英石越來越普遍，技術仍然係新，所以唔排除以上嘅問題好快會被解決。
當然，人造石以外就仲有天然嘅雲石、麻石同不銹鋼材。一般認為天然石係靚啲、天然啲，不過可能會疏水，因為石，尤其係雲石，係有孔的（porous）。不銹鋼就見人見智，餐廳廚房都係用不銹鋼，容易打理，不過要小心唔好整花。
2013年7月8日星期一
新居啟動之陸拾肆 - 茲曼尼梳化入屋
從茲曼尼買的布套皮梳化運到了，當我上到新居時，外母大人已經著工人攪掂了安裝，睇住啡色梳化同木紋磚嘅配搭，只能說磚同梳化嘅顏色都買對了。
還好無揀再大半號嘅梳化model，否則客廳感覺會更細了，有時呢啲嘢很真係有條fine line的。
2013年6月26日星期三
新居啟動之陸拾叄 - 小小工人房improvement工程
自從師傅封咗道工人房牆，我就覺得間房都幾焗下，工人一定會住得辛苦，佢亦可能會唔開心。唯有喺自己方面做好啲，所以叫咗師傅加一個百葉通風，師傅仲提議加多個抽氣扇，好提議！即刻接受啦！
整好之後道牆就變咗咁嘅樣，另一邊嘅巴士門都有百葉嘅，希望達到兩邊對流窗嘅效果啦。
2013年6月22日星期六
新居啟動之陸拾貮 - 淘燈飾入手
今朝去福田會合咗幫我喺深圳收淘寶貨嘅朋友，然後一齊搭火車出返市區，兩盞燈唔重，不過包裝大件啲，我拖車仔都好方便嘅。
擺低咗盞燈我就走人了。點知師傅話安裝時發生短路，第三排燈都著唔到，懷疑隻牛燒咗，張相仲見到燶咗一撻。另外兩排燈就好似無事。我唱住「為何偏偏選中我」咁搵我個朋友安排換貨，唔好意思又要煩到人。
喺佢幫我小緊個dealer時，師傅call我話佢哋又搞掂了，佢話之前啲線擺得唔好，條電線掂到個金屬盤，所以先發生短路，隻牛幸免於難，佢哋搞咗一輪後就掂咗喇，真係大吉大利！
完成後都睇落ok，過一兩日我上去睇下真身先！
2013年6月21日星期五
新居啟動之陸拾壹 - 焗爐、抽油煙機歸位
煤氣公司師傅一日內把煮食爐同大佬畀我嘅焗爐裝好了，唔知係咪work嘅呢？
至於德國寶抽油煙機都裝好，睇落去好大工程，先將摩打收入廚櫃，煙喉經假天花跨去另一邊廚櫃，再經廚櫃穿入工人厠，然後先出到街……希望咁都可以抽得ok啦，都幾遠水路，第時我會考慮埋呢樣嘢㗎喇！
2013年6月20日星期四
新居啟動之陸拾 - 鑊氣list
今日好熱，個人又好攰！
成個晏晝飯都無食，走咗去整把三星鎖，真係令人想發狂鬧人發洩呀！雖然最後都都整咗，但我覺得舟車勞頓，連把鎖都殘咗囉，仲有來來回回的士錢都唔少啦！
把心一橫，寫返個鑊氣list，等我唔好忘記……
1. 電子鎖底板壞了
- 買把全新鎖都會壞底板嘅？無得換因為過咗7日。無得上門修理因為叫師傅自己裝，上門要收$350。要自己拎去紅磡整，諗住午飯時間去，修理部又1-2pm食飯，真係趕頭趕命，一拆一裝仲驚把鎖花晒。其實啲生意都幾好做，賣個壞鎖畀人，如果人哋嫌煩就賺多$350！仲好驚兩年保養期過咗後唔知點算𠻹，買新嘅底板都可以壞，兩年後更加唔駛講……
2.冷氣機搖控壞了
- 網上買冷氣，諗住唔係揾最平，喺元朗做街坊生意嘅，裝全新大金冷氣，個搖控唔work，又叫我打電話揾原廠保養，大佬，畀成皮嘢唔該唔好賣我次貨好唔好？！
3. 面盆盆冚石裝了做石冚盆
- 明明買咗個流線型嘅面盆，師傅竟然用塊雲石冚住咗佢，激死朕了！冒住雲石會爛嘅風險，都叫師傅整返好佢！
2013年6月16日星期日
新居啟動之伍拾玖 - 無線電門鐘金蟬脫殻
哈哈！自從我在討論區得知可以用自己嘅制面去換嗰啲無線電門鐘嘅制面之後，我就無打算過唔換了，而且我好早期就已經買咗呢隻E3000嘅門鐘制，唔用就會嘥咗！
我去鴨寮街問過，有啲衰舖同我講唔會得，得一間同我講話可以自己換，不過都唔緊要啦，我喺討論區已經見過成功嘅例子，所以我就叫師傅幫手換，好彩師傅做到之餘仲整到咁fit𠻹！正呀！
新居啟動之伍拾捌 - 面盆的疑惑3
訂閱：
文章 (Atom)