新居啟動之陸拾伍 - 分析廚房無縫石

嘩！已經有一個月無update個裝修blog了。今日週末時分，等我補寫返一啲之前無寫嘅題材啦。

之前一直以為現居個廚房個工作平台係用啲類似塑膠嘅物料做的，到新屋裝修學咗嘢先知道原來呢啲叫無縫石，係一種合成嘅堅硬物料，溶點高過攝氏100度，所以適合家居用途；而另一方面，佢嘅溶點亦只係100度多啲，所以可塑性強，容易造出彎曲嘅效果，同埋可以用黏著劑達到無縫黏著嘅效果，感覺上就係一塊過，因而稱為「無縫石」。

無縫石由美國DuPont首創Corian，後來當然係仿品如雨後春荀般出現，師傅第一次係報Samsung Staron畀我哋；現居則用Surell，係Formica旗下嘅牌子。似乎一般都係呢幾隻牌子，Corian貴啲，Surell平啲，Staron似乎係最平。Corian同Staron每季都有幾款石做特價，其實來來去去都係幾款，平過其他好多㗎，睇錢份上就用大路貨啦。我經朋友介紹，用Corian有$6xx一直呎，好似話代理攞貨都係呢個價喎…… Surell我就無特別研究了。

咁除咗無縫石仲有咩選擇呀？我知道而家都多人考慮用石英石，其實都係人造石嘅一種，不過用料同工序都同無縫石不同，佢硬度好足夠、溶點幾千度，得出嚟嘅就係更耐用嘅物料。缺點係「有縫」會見到接駁位，同埋無咁流線形的，因為物料嘅可塑性較低。不過，從網上都睇得出石英石越來越普遍，技術仍然係新，所以唔排除以上嘅問題好快會被解決。

當然，人造石以外就仲有天然嘅雲石、麻石同不銹鋼材。一般認為天然石係靚啲、天然啲，不過可能會疏水，因為石，尤其係雲石，係有孔的（porous）。不銹鋼就見人見智，餐廳廚房都係用不銹鋼，容易打理，不過要小心唔好整花。