亦雖然我咁講，我覺得我哋喺搵建材方面已經花咗好多時間，我哋始終唔係有經驗嘅人，好多都要慢慢學，我哋連元朗、荃灣都行埋㗎喇，都咪話唔辛苦，有時老婆腹大便便都跟我出去睇，辛苦晒……（感動中）
喺揀建材方面，我哋花得最多時間喺磚上面，大大話話睇咗十次八次，其次就係浴室潔具，有一部分聽網上指示去咗荃灣買，一部分我午飯時去灣仔睇，主要係因為師傅話個面盆窄身啲廁所空間會大啲，所以選擇不多。
最後，廳房地磚我哋用咗隻意大利木紋磚，Tortora色，唔知點解好似平得滯，但我哋上網又搵到呢隻磚嘅網頁，又唔似係無信譽喎，網上面又無乜特別評價，所以膽粗粗試下啦。
意大利磚Ragno網頁
浴室牆、地磚我哋用同一隻西班牙米黃色嘅石紋磚，又係做緊promotion，又係覺得好抵，本來都target咗廚厠買大陸磚㗎喇，但難得見到啲西班牙磚啱心水又啱budget呢！
唯有求神拜佛，平嘢一定要有好呀！其實我都係本住一個信念，就係旺角嘅商家都不會騙人的，最多都只不過係一分錢一分貨啫，呢個道理我唔會唔明嘅……
至於廚房地磚同牆磚我哋就真係買咗大陸磚，不過唔係以平掛帥的。其實原本都睇啱隻半價嘅黑色地磚，不過淨運費好似好貴，所以行咗去買西班牙磚嗰間買，理論上質素係ok啲嘅， 只不過原來運輸費冇慳到啫。最後當日都買埋隻工人廁牆磚，終於大功告成！可惜我不是韋小寶，哈哈！
沒有留言:
發佈留言