GG Reboot: 新居啟動之拾伍 - 淺談上網線路接駁

今日無上到新居視察，因為聽日去完旺角買掃口粉後，都會送去新屋，今日姑且放自己一日假期。

所以今日都係講返之前做過嘅一啲資料搜集－上網線路接駁。呢樣嘢都緊要嘅，上網做少少research就會發現好多人都唔熟呢一範（當然包括我自己），甚至話好多師傅都唔在行，好容易搞錯或者完全做錯晒！

當然，如果肯定自己對網絡無要求，咁就無乜所謂嘅，唔會死人嘅。只不過，裝修係講緊十年以上嘅事情，今日無要求都唔代表幾年後無要求，況且科技日新月異，唔貴太多的話應該做好少少，等佢壽命長一啲。

我個單位有光纖接駁，PCCW有1000Mb，所以我都預咗將來會有條光纖入屋，然後要再拉線做室內嘅接駁。阿屎喺電盈做網絡project嘅PM，所以有嘢梗係問佢先啦，喺佢身上攞咗啲concept，基本上光纖入屋後會走入PCCW自己嘅一個盒仔，盒仔上面都有幾個頭，同router一樣，理論上如果要接駁嘅device都喺盒仔附近，又或者全屋都諗住行wifi的話，係唔需要再拉線的。

呢個問題我都有諗過，wifi速度有限就親身經歷，而是屋越大，傳送亦越慢，而駁咗線先，就算係$550一個制位，計落都係有限錢，稍為有要求都唔需要多諗啦。

至於另一個問題係要駁幾多條線先至夠。我開頭真係唔識點諗，好彩google一下就會發現無論香港定台灣，都有無數人喺網上問過呢個問題，答案亦當然有！首先，正如上面所述，電盈個盒仔已經會走條線出嚟，問題在於點將呢條線穿牆入到房裏面，如果盒仔喺擺廳嘅，盒仔附近就要有X個RJ45嘅插口，X對應返有幾多個廳以外嘅插口。例如我想駁線入書房同仔仔房，X便起碼等如2。

RJ45其實就係一般嘅LAN插頭

幻想一下，將來盒仔會走兩條明線，插落個RJ45插口，書房再將電腦駁落個房入面嘅RJ45，咁就上到網了。另外，我跟從各位網友前輩指示，X等如4。因為佢哋話一條喉可以拉兩條線，造咗喉就唔好嘥，剩返嗰條可以備用，同埋兩條cable經過轉換器係可以當HDMI咁用，所以拉兩條線，只有百利而無一害！

最後，仲有一樣嘢係大家要考慮嘅，就係駁咩線呢？十年前我讀書時，上網係用條CAT5線接駁的，今日標準又係咩呢？既然話裝修係十年、八年嘅事，我當然首要考慮用壽命較長嘅選擇啦。原來，而家最常見嘅係CAT5e線，係CAT5嘅進階版，可以話係今天嘅基準。再高一級嘅係CAT6線，根據WIKI，佢55米內可以支援10-gigabit ethernet，應該對下幾年都夠洗喇掛！而且CAT6只係比CAT5E貴幾百蚊一箱，好似話一百呎定一百米一箱，一箱夠用啦，所以我根本不作他想，一早決定咗用CAT6。唯一要注意嘅係CAT6線入面有條十字膠，拉線時比較困難，尤其係一條喉拉兩條線，如果師傅唔熟呢樣嘢，記得要提提佢呀。