新居啟動之貮拾陸 - 梳化篇

繼尋日去沙田睇咗一轉梳化之後，今日又去咗荃灣睇多一round，仲落埋單，真係攰到爆。其實一早我哋都鎖定咗買布梳化，因為感覺上布梳化真係可以換樣，睇到厭咗、整花咗都可以換咗佢，一了百了。而皮梳化又真係唔平喎，尋日行咗幾間啲皮梳化都係過萬的，所以我哋都乖乖的繼續睇布梳化了。

今次買梳化都係揀咗茲曼尼，佢哋嘅口碑一向都唔差嘅，講起啲唔太貴嘅梳化，都總會有人講起呢間。而佢啲布藝梳化我都覺得唔錯嘅。

呢個月仲咁啱撞到佢哋做promo，皮梳化八折，布梳化七二折，額外買布套有四折，聽落都覺得抵。經過一輪布海掙扎，終於都揀咗兩隻又有貨又啱心水嘅布，其實真係好困難，通常睇啱佢又話無貨……後來我哋仲揀咗隻真皮加仿皮加布嘅款式，咁樣做出嚟嘅價錢仲平呢！因此後來又要揀多隻皮嘅式樣，又用多咗時間。

埋單時仲買多咗一個布套替換同四個咕臣套，總共都唔洗八千蚊，感覺好抵呢！

呢隻係淺啡色，絨絨嘅感覺應該唔錯

呢隻深啲嘅啡色係麻布質感，係我心目中布梳化應該帶嚟嘅效果

其中兩個咕臣係呢隻啡色花，另一種花我唔記得影低tim！