新居啟動之貮拾肆 - 面盆的疑惑2

再續尋日搵面盆之旅，今日依然火大。

今日send咗張一個連開孔闊380mm嘅台底盆畀師傅，諗住過骨啦，因為佢話總闊度420以下都唔會阻到度門嘛。點知佢依家先又同我講前後起碼要預60mm，嗰下我真係火都嚟埋，大佬，我啲時間都好寶貴架，你有咁多要求，唔該唔好揤牙膏咁逐啲揤出嚟好唔好？我大大話話行行咗十幾次睇面盆，今次先第一次聽話要340嘅盆，真係嘔晒血……

我同太太都覺得呢個ok，我唯一驚太平，$500咋，
怕質素特別差，不過諗佢咁平可能因為清貨啫，個樣都唔差喎，
點知師傅一嘢KO咗佢，頂！

咁都算數，因為我手頭上又真係有一個340闊嘅盆，雖然我哋都唔係覺得係最滿意嘅，個盆真係窄咗少少，因為條邊都幾闊吓，另外龍頭嘅另外一邊係淺啲嘅，睇就可能幾特別，但實用性係有啲限制。但係都無計，師傅要340嘛，咪試呢個囉。哈！點知師傅又話個龍頭喺一邊開會阻住，呢個我真係唔太認同，不過我又忍你，我問佢咁你有無建議我去邊度買好。佢竟然send幾張橢圓形嘅台上盆嘅相過嚟，結果又係一陣無名火起，係你建議用台底盆我先搵得咁辛苦，而家我搵唔到咁窄嘅盆，你畀啲咁嘅相我睇？你抽水唔該行遠啲啦……




呢個我發現咗好耐，大陸造嘅，
勝在真係有咁窄，仲要係方盆，
如果唔係太太ok咗個Kohler，我會買呢個囉……

可能佢都知衰，即刻補過電話解畫，即係其實佢都係想我用啲寶貴時間去搵個台底盆，雖然佢根本無sample相係有呢啲咁嘅盆嘅！不過佢都有個point，就係橢圓好過方盆，橢圓收口無咁容易撞到，呢個point其實我都有啲火，我搵盆咁耐，一路都係畀啲方盆相佢睇，佢一直畀我嘅印象都只係要搵個窄啲，並無話到方盆係死罪嚟嘅，而家先同我謂橢圓好啲，真係好想打爆佢！

但係呢個場面只係存在喺我嘅幻想當中，我當時都只係想快啲攪掂佢，咁就試吓搵啲窄嘅橢圓盆啦。結果都係意料之中，因為我已經行到熟晒，窄橢圓其實真係好少好少，呢隻Roca嘅Roden連孔410mm已經係最窄，都係滿足唔到老細（係！佢已經由師傅升咗做老細，我湊佢辛苦過湊老細）嘅要求。如果好眼力嘅會見到Roden下面仲有隻N Meridian，600x340，西班牙造，又係側邊開孔，面價要二千三百幾蚊，仲話無現貨，要專登訂嘅，咁我不如買之前嗰個。咁我繼續睇吓先……




全灣仔橢圓台底盆最窄係呢個喇，都要410mm



如果訂就可以買呢個Roca N-Meridian，闊340，側邊開孔

行到六點幾，好多舖頭都已經關門，我都諗住差唔多收工了，只係順路見到未收舖就睇埋，於是，畀我見到呢個Kohler，寫住要$2160，唔知折實要幾多錢，闊度唔連開孔376，感覺上好過側邊裝龍頭，可以角落頭裝。跟住send畀師傅睇，佢話ok，真係……你話佢唔係老細我都唔信，為咗佢我喺個面盆身上洗多一千蚊！


Kohler盆，闊376mm，似乎呢個大家都滿意。