2013年8月24日星期六

新居啟動之柒拾 - 燈飾貨到安裝

上次提過喺元朗合益路一間叫巴黎站嘅燈鋪買咗4盞燈,週末安裝了,姑且貼上來紀念一番。

效果不錯,算是同心目中的預期效果一樣吧。房燈就比較簡單,也是幾百蚊的貨色,所以評價一般,哈哈。






2013年8月21日星期三

新居啟動之陸拾玖 - 宜家衣櫃及書枱製成品

早前喺宜家訂嘅書枱同衣櫃星期二晩到咗,upload返上嚟留個記錄啫。

講開呢兩件嘢,我就真係有啲失策,度牆身闊度時竟然睇漏咗個燈制,結果攞得太盡,個櫃擺好位後遮住咗個冷氣開關制,要將個櫃拉離牆一啲先得;然後我又忘記咗冷氣機嘅厚度,以為個櫃可以泊埋道牆,而條陣會頂住,所以買咗個200cm高嘅櫃,點知個冷氣機都係頂,所以又係要拉出啲,條陣一啲影響都無,早知可以㨂個236cm高嘅櫃啦……真係失禮呢……





2013年8月18日星期日

新居啟動之陸拾捌 - 訂造窗簾@元朗

承接尋日所講,我同太太尋日一次過喺元朗搞掂咗燈飾同窗簾。

綜合網上資訊,元朗窗簾鋪主要集中喺元朗大橋街巿、教育路同合益路。大橋街市似乎係最平、教育路似乎最多鋪頭、合益路就最近我屋企,所以貪方便嘅我只係行咗合益路。

合益路唔係好長,不過都有起碼5間窗簾鋪。我就行咗3間,有一間好似就執笠所以無睇,有一間叫恆寶兼營牆紙,當時覺得唔夠專同埋門面較暗,所以無入到去,但後來見網上都有人介紹呢間,話布嘅選擇較多。

行第一間叫一本,小店一間,印象唔深,行入去一排都未有人招呼,因為有人投訴緊。Well……我畀咗一至兩分鐘時間佢,都係無人理,只能夠話佢服務好一般,企正喺隔離都淨係掛住搞complaint。有人有投訴,我當然唔會踩落去。

第二間叫瑞祥,網上有人讚好,但唔知有幾堅,我覺得負責人都熟手嘅,態度都ok。布料選擇係多嘅,低、中、高價位都有,因為我隻窗闊,佢話要用闊幅布,最平係$98一碼,亦有$128、$2xx、$4xx一碼。但係佢安裝就收我$800,九龍區度尺就再收多$200。感覺安裝唔駛收咁貴囉,裝6個窗唔駛一日人工啩。

因此,我行咗去第三間叫富達。佢應該淨係做經濟實惠嘅生意,全鋪都係$88蚊一碼、遮光料就$128一碼,安裝只收$300,度尺免費。計埋都有平幾多,所以最後我就帶咗太太嚟呢間。約咗下個禮拜度尺,希望無鑊氣!

P.S. 做功課揀咗幾隻布款,太太篩選後只剩下一款,T_T……









2013年8月17日星期六

新居啟動之陸拾柒 - 購買燈飾@元朗

既然決定了下個月要搬入新居,無論照顧BB有幾忙都好,始終要為新居嘅工程埋尾。今日,我同太太就搞掂了燈飾同窗簾。

由於要湊B嘅關係,買嘢地點一定要喺元朗,所以我都無同旺角等地方格價,最緊要係唔好花我太多時間。結果,我行咗合益路幾轉,每次行過我都睇下啲燈飾,本來都睇中咗啲飛利浦燈嘅,雖然價錢係偏向貴啲,不過諗住質素高啲嘛。

點知早兩日我又去合益路做功課,畀我發現到有間叫巴黎站嘅燈飾鋪,佢啲燈嘅設計幾啱心水,唔係平時見開嗰啲款,價錢做標價嘅七折,感覺係相宜嘅,一盞6頭天花燈折實後千三蚊。向太太交功課後,今日下午就去嗰度確認燈款同落單,買咗飯廳吊燈一盞、客廳6頭天花燈一盞、主人房仔房吸頂燈各一盞,連埋慳電膽就埋單三千蚊左右。

心中感覺都良好嘅,雖然難免係大陸造,但飛利浦都係大陸造啦,而我哋又真係無時間上深圳田貝四路嘛,更加唔想同人講價,因此,特此推介。


2013年8月10日星期六

新居啟動之陸拾陸 - 選購現成傢俬

新居裝修已經差不多完成,只差執漏。我見樓上裝修已經完工、而再樓上嘅裝修都應該差唔多啦啩,所以打算九月中就搬入去,都係時候買埋啲唔諗住訂造嘅傢俬了。

唔訂造呢啲傢俬嘅原因主要係想買現成嘅慳返啲,所以買嘅傢俬都唔會買貴嘅。衣櫃同書枱就買IKEA嘅PAX及GALANT系列;囝囝房張子母床同餐枱就去元朗附近嘅傢俬舖買,都喺預算之內,希望實物都一樣ok啦!





新居啟動之陸拾伍 - 分析廚房無縫石

嘩!已經有一個月無update個裝修blog了。今日週末時分,等我補寫返一啲之前無寫嘅題材啦。

之前一直以為現居個廚房個工作平台係用啲類似塑膠嘅物料做的,到新屋裝修學咗嘢先知道原來呢啲叫無縫石,係一種合成嘅堅硬物料,溶點高過攝氏100度,所以適合家居用途;而另一方面,佢嘅溶點亦只係100度多啲,所以可塑性強,容易造出彎曲嘅效果,同埋可以用黏著劑達到無縫黏著嘅效果,感覺上就係一塊過,因而稱為「無縫石」。

無縫石由美國DuPont首創Corian,後來當然係仿品如雨後春荀般出現,師傅第一次係報Samsung Staron畀我哋;現居則用Surell,係Formica旗下嘅牌子。似乎一般都係呢幾隻牌子,Corian貴啲,Surell平啲,Staron似乎係最平。Corian同Staron每季都有幾款石做特價,其實來來去去都係幾款,平過其他好多㗎,睇錢份上就用大路貨啦。我經朋友介紹,用Corian有$6xx一直呎,好似話代理攞貨都係呢個價喎…… Surell我就無特別研究了。

咁除咗無縫石仲有咩選擇呀?我知道而家都多人考慮用石英石,其實都係人造石嘅一種,不過用料同工序都同無縫石不同,佢硬度好足夠、溶點幾千度,得出嚟嘅就係更耐用嘅物料。缺點係「有縫」會見到接駁位,同埋無咁流線形的,因為物料嘅可塑性較低。不過,從網上都睇得出石英石越來越普遍,技術仍然係新,所以唔排除以上嘅問題好快會被解決。

當然,人造石以外就仲有天然嘅雲石、麻石同不銹鋼材。一般認為天然石係靚啲、天然啲,不過可能會疏水,因為石,尤其係雲石,係有孔的(porous)。不銹鋼就見人見智,餐廳廚房都係用不銹鋼,容易打理,不過要小心唔好整花。

2013年8月2日星期五

GG土耳其之夏之伍 - 伊斯坦堡街頭小吃

雖然我話伊斯坦堡比好多歐洲城市更歐洲,但無可否認,佢亦包含了好多亞洲風味,例如土耳其人嘅熱情、Bazzar嘅熱鬧、無序感,及街頭如過江之鯽嘅小食店。

我兩口子對食最為敏感,街頭小吃也試了一些,以下只是稍為分享一下。Turkish delight當然唔算街頭小食,不過係土耳其小吃嘅一絕,所以順帶提一下吧。

燒粟米同烚粟米,以我所見應該係最受歡迎嘅食物,我們在旅程最後一天終於試了一條燒的,你睇太太食得幾咁開懷?

 
呢間Turkish delight舖頭出名㗎,location又好易揾,試食又疏爽,呵呵。一試就知同人哋買做紀念品嘅差幾皮!我哋買咗好幾款試食,最後下面中間有糖霜包住嗰隻跑出咗,我哋買咗五、六條返香港慢慢食。真係好味的,唔太甜、又果味濃郁!


 
呢隻就係土耳其雪糕dondurma喇,佢比我哋平時食嘅雪糕係杰啲同有嚼勁嘅,感覺都幾得意嘅,大熱天時就更加可愛了。

 
由old town到Galata嗰邊有一條跨海大橋,橋邊似乎長期都有無限咁多人在釣魚,橋下有一連串嘅做遊客生意嘅海鮮餐廳,一副遊客陷阱的樣子。不過,有一樣食物是地道的,它就是fish sandwiches。簡單的麵包上夾一塊煎魚,價錢只係3.5里拉,真係抵,至於係咪好好味就見仁見智了,都ok嘅,而是幾有風味𠻹……

 

2013年7月29日星期一

GG土耳其之夏之柒 - 必須要試一次的土耳其浴經驗談

我相信土耳其浴絕對係去土耳其一個不得不試嘅經歷。人在伊斯坦堡,便會留意到土耳其浴場大行其道,其造型及規模只比清真寺低一級,更有不少為歷史性建築物,由名建築師設計。

土耳其浴其實係有啲類似焗桑拿,不過就唔係太多濕蒸或乾蒸,我覺得重點係先要喺一個較熱嘅房間出汗,以達致排毒嘅效果,然後再有專人替你沐浴及按摩,呢一切都喺公共浴場發生,要私人空間就可能要問清楚有無咁嘅可能了。

我朋友Eric都覺得土耳其浴係要試,但佢覺得畀啲鬍鬚佬喺身上抹嚟抹去好嘔心喎,唔知其他人怕唔怕,怕就要有心理準備喇。

反而我較花多啲時間諗下點同老婆一齊去Hamam,經過一輪research,我知道有好多浴場都招待男女賓,只不過好多都要分開沐浴,我哋又唔係好想分開玩,行孖咇開心啲。另外我亦都想揾啲較有歷史嘅浴場,首選由大建築師設計的。

終於,其實只有一個選擇,我揀咗Süleymaniye Hamam(地址:Mimar Sinan Caddesi  No:20 Süleymaniye),佢係伊斯坦布堡唯一一間可以男女共浴嘅土耳其浴場,咁我同太太就可以一齊試呢個體驗啦,建築師係Mimar Sinan,即係起Topkapi Palace同Süleymaniye Mosque嘅大師傅。當然,要提一提大家男女共浴都係由男性工作人員負責的,按摩擦身亦然,大家如果接受唔到就唔好試了,其他男女分浴嘅浴場係有女服務員的,千祈唔好為咗呢啲嘢而唔開心呀。

太太話個服務員都有就住,無攪胸部等敏感部位,你估網絡色情小說咩?我哋都覺得按摩擦身都好舒服,真係周身舒泰㗎。如果時間許可,我都想去多次,呵呵!

Hamam內典雅的裝潢。
太太徹底排毒後滿足的樣子。

GG土耳其之夏之陸 - Bosphorus海峽之旅

歐洲大陸同亞洲大陸嘅分隔之處一向唔係太清晰,因為歐亞大陸其實就係一大塊land mass。不過,一般嚟講都認為Bosphorus海峽就係歐、亞分隔之地,所以土耳其也被認為係橫跨歐、亞嘅國家。而伊斯坦堡就更加係隔住個海峽就可以由歐洲望見亞洲,喺1453年,奧斯曼帝國嘅海軍就係沿住Bosphorus海峽由北面、東面及南面,同西面嘅陸軍夾攻過來。

今天,遊客可以乘搭渡輪從伊斯坦堡出發,沿著Bosphorus海峽北上遊覽,我兩口子當然無錯過了。

Official嘅渡輪由伊斯坦堡渡輪碼頭出發,大家要問下或者揾下邊一個票站係賣Bosphorus cruise嘅船飛喇,買咗飛先至去碼頭等船,都好多人㗎,記得帶定多啲水去飲呢……












2013年7月28日星期日

GG土耳其之夏之肆 - Fine dining@伊斯坦堡

早一個entry介紹過伊斯坦堡嘅Kebab,今次等我介紹吓上次去伊斯坦堡fine dining嘅經驗啦。

其實我哋只係跟Lonely Planet嘅介紹,去咗一間由當地嘅一位celebrity chef Mehmet Gürs開嘅餐廳啫。根據書本所講呢位Mehmet Gürs嘅出名程度就好似Jamie Oliver喺英美嘅程度相若。Wikipedia亦有話佢係「Istanbul's most recognizable chef」。

Mikla餐廳位於伊斯坦堡北面嘅Beyoğlu區,喺一間叫Pera Palace Hotel嘅最高兩層,上面係酒吧,下面係餐廳,個view正到不得了,嘢食亦都係比較特別嘅地中海及瑞典風菜式,而且仲要係celebrity chef做主廚喎,我記得價錢係幾相宜,以整體配套嚟講好似都係幾百蚊,唔駛過千。

結果太太玩得食得好開心,我都覺得成日玩budget遊或中budget遊,間唔時都要加啲呢啲元素,縱容吓自己,話晒而家都係成年人,要開始識得享受了……

從餐廳頂樓的酒吧,望向Sultanahmet嘅方向,可見蘇菲亞大教堂、藍色清真寺及Taksim呢邊嘅Galata Tower,正!

偷得浮生半日閒,當日未到蒲吧時間,成個場都係我倆嘅。

第一客頭盤,太太記得呢個係沙甸魚薄脆,脆而不膩,口感一流。

頭盤二號,薄切煙燻牛肉併芝士,配搭幾新鮮,好味!

主菜一,呢個無記錯應該係鵪鶉。

呢個係焞牛仔肉伴綠豆湯

食吓食吓已經係黃昏時分,從窗台向外望向Golden Horn方向,果然有金光閃閃嘅意境呢!

Zoom埋去舊城區,可見黃昏色調嘅三大建築,Nice view也!

Zoom後一啲,就見返黃昏時分嘅Borsphorus海峽同Golden Horn嘅入口