顧名思義，電制制面指燈制、插蘇、冷氣制、門鐘制，以至TV線同上網線路嘅插位等，五花八門，難以盡錄。不單如此，除咗牌子選擇外，每個品牌仲有不同設計，可以膠面、金屬面，甚至玻璃面，價錢由幾十蚊到幾百蚊都有，唔知有無一千蚊個嘅呢。
唔講唔知，電制面竟然唔係旺角最平。暫時見到最平嘅喺荃灣德華街，嗰度有兩間賣制面，我就去開利買嘅。呢條街轉角沙咀道，就係香討聞名已久嘅荃灣肥仔 - 日東五金潔具。從此我就知道原來荃灣都係臥虎藏龍之地！
牌子方面，我喺香討都學到唔少嘢。最普遍香港人用嘅係Schneider，被收購前叫Clipsal奇勝，所謂嘅E3000、E8000都係奇勝嘅。太太一早喺人哋屋企見過E3000已經揀中咗，不作他選了。Schneider都有好幾條line，我下面就揀咗3條，最下面嗰款應該似最貴……
另外香討嘅專家又對ABB及LeGrand都有幾好嘅評價，一分錢、一分貨啩。其實去一去佢哋網頁就知道佢哋嘅真正主業係做工程有關嘅project，所以啲嘢唔平真係一啲都唔意外，而如果話佢哋安全啲對佢哋信心大啲，又都係唔意外喎。
睇下LeGrand啲相就知道「型」字點寫，喺灣仔旺角標緊二、三百蚊一隻，唔知荃灣賣幾錢呢？
ABB外形就好似普通少少，不過畀人嘅感覺好似實而不華、重質不重量咁，我諗簡約feel都係歐洲慣常嘅作風，睇吓啱唔啱大家囉。聽講話賣呢隻牌子嘅比較少，呢排開始聽多咗人會淘呢隻制，好似好ok。
除以上外，要貴嘅仲有Gira、Berker，啱啱又有人話MK呢個牌子OK，好似話以前係英國造，而家唔知邊度造喎，個樣唔似貴嘢，可以留意一下。
沒有留言:
發佈留言