工人廁麻雀雖小，必須五臟俱全。
先來檢視下個抽氣扇，師傅知我忙而代賣嘅6吋KDK抽氣扇，電子shutter、前方後圓，佢話靚啲耐用啲喎，我都同意嘅，雖然價值不菲，要五百八十個大洋。
2013年6月9日星期日
新居啟動之伍拾貮 - 燈槽完成
嗰日師傅話買住8盞LED射燈，唔夠先再買，轉頭佢已經叫人開了8個射燈孔，我心諗，咁即係都決定咗啦，哈哈。
今日上去就見到燈槽已經完成，用新裝嘅奇勝E3000 2-way制亦可成功控制。
師傅話隻T5光管係米黃色，但今日日頭望落似偏白，搵日夜晚去睇下接唔接受到先！相片上話係840色，網上啲人話呢個係柔白色，辦公室多數用呢隻喎……辦公室？！
無論如何，我都好有成功感呀！終於都行到呢一步喇！
2013年6月8日星期六
新居啟動之伍拾- 無線電門鐘
之前無預到裝門鐘嘅線，而家會用無線電門鐘。其實整一個電制位要五百蚊以上，而一個無線電門鐘只賣五十至一百蚊，所以，即使有要間唔時要換電嘅不便，都確實可以慳到幾百蚊嘅，而且亦睇唔到有線門鐘有乜特別嘅好處。
至於佢個外型就真係唔係太討好，香討都有網友試過將自己買嘅門鐘制面冚上去換咗個面板嘅經驗，我問師傅得唔得，佢話遲啲試下喎。
新居啟動之肆拾玖 - 廚廁假天花及筒燈
尋日上到去亦見到廚房同廁所嘅假天花已經大致上裝上去了，感覺離完工越嚟越近了。
仲俾我喺櫃桶見到筒燈嘅真面目，雖然在網上揾唔到Oltis呢個牌子，呵呵！
裝好咗就係呢個樣喇。嘩！每盞有2個燈泡咁多嘅？係喎，我而家間屋原本都係2個燈膽，係后來壞咗先越換越少啫。
浴室寶都裝咗，希望佢能夠多多少少取代抽氣扇嘅功能。假天花下走條一般圓形鋁出風喉，無煩住去打鐵鋪整條長方形金屬喉了。
新居啟動之肆拾捌 - 小小的工人房
尋日好忙，淨係上落新屋、落旺角、深水埗買嘢都三轉，喺咁嘅天氣下都唔好話唔辛苦，不過為咗快、靚、正，都係要咁做嘅。
一上去就見到工人房道木板牆已經封咗，之前都可以經過佢入廚房嘅。所謂工人房都係擺床同私人儲物，其他活動空間就要喺屋嘅其他地方同工人廁了。
呢度會裝巴士門加百葉做通風，要上一級先入到……
2013年6月7日星期五
新居啟動之肆拾柒 - 裝鏡牆
飯廳嘅其中一面牆會係一面鏡，希望個廳望落去大啲，而廚房道趟門會趟到鏡牆前面，師傅似乎先在牆上加呢啲一塊塊嘅木板，將塊鏡（相信要多於一塊）黏落去。
真係未見過都唔知係咁樣整呢！
Day 1見到一塊塊嘅木頭。
Day X已經見到趟門走嘅路軌。
Day X+1就見到多咗啲木條，簡直好似做勞作咁樣，究竟係咪真係有晒公認嘅程序嘅呢？
新居啟動之肆拾陸 - 燈槽似樣了
早前一路跟進嘅燈槽已經進入大直路，早幾日開始髹白油，前日上去再睇已經髹好晒喇。
師傅早前亦問我要買幾多枝LED射燈，火數多少、要咩款，我好老實答佢我無idea，真係無諗過，而家亦唔得閒諗。佢知我忙所以代買，影咗啲相畀我揀，最後揀咗菲利浦白邊3眼仔、8W LED8盞，$280一盞…… :S
新居啟動之肆拾肆 - 傢俬安裝進度報告2
又有進度報告，呢排週身唔得閒呢，不過忙得好快樂。
電視櫃已經安裝，似乎都幾似樣，雖然鞋面好似會好效果過光面。
呢一張就係工人床喇。左手面下面係鞋櫃，右手面下面係儲物空間，畀工人擺喼等雜物。雖然唔夠3尺，但希望工人唔好太介意啦……
訂閱：
文章 (Atom)