自我反省

如果，如織田信長所講，人生只有五十年，咁我嘅人生已經過咗三分之二；又如果呢五十年係由十歲先開始計，咁都算過咗一半。

喺呢一半嘅人生，稍為反思一下，會發現自己經歷嘅轉變都幾大，可以話由一種人變咗做另一種人，大概就係由細路變咗大人吧（笑！）。

由借書睇到買書睇，由睇科普書籍到睇人文科學書籍。最近睇嘅都係歷史書或歷史小說、同埋語言學有關嘅書。反而科學最尖端嘅已經追唔上，因為始終唔喺嗰行，唔係生命嘅一部分，新嘅學說固然有其尖端之處，但未能夠畀到嗰種滿足好奇心嘅快感，因為我已經知道了大概，其他都係細節，要累積夠啲advances先至夠畀到新鮮感、滿足感。

歷史有關嘅書籍真係讀極都讀唔完，買到一書架都係都睇唔晒，當然我都無畀好多時間睇，但我一本書都係新世界，令我覺得學到嘢。

語言學呢，我覺得係一門好似演化學嘅人文科學。因為無人知道語言喺有文字之前係點嘅，好明顯人係識得講嘢先過識得寫字同使用文字，而且我哋香港人都知道，寫嘅同講嘅都係唔同，文言文就係一個絕佳嘅例子。所以對語言嘅理解要靠文獻同埋推斷，亦要靠證據去確立推斷嘅可信性，完全係科學嘅基本，係好有趣嘅一件事。當然，我係以科普嘅角度去睇呢件事，當故事書咁去理解。嚟緊我仲想瞭解多啲，但我嘅語言造詣只係一般，相信最後都只會停留於興趣班之流。